ബീജിംഗ്: ഉത്തര കൊറിയൻ ഏകാധിപതി കിം ജോംഗ് ഉന്നും അനന്തരാവകാശിയെന്ന് കരുതപ്പെടുന്ന മകൾ കിം ജുഏയും ചൈനീസ് സന്ദർശനത്തിനായി എത്തിയിരിക്കുകയാണ്. ചൈനയുടെ വിജയദിന പരേഡിൽ പങ്കെടുക്കാനാണ് കിമ്മും മകളും എത്തിയത്. 1959നുശേഷം ഒരു ഉത്തരകൊറിയൻ നേതാവ് ചൈനയുടെ സൈനിക പരേഡിൽ പങ്കെടുക്കുന്നത് ഇതാദ്യമായാണ്. ഉത്തര കൊറിയയിൽ നിന്ന് സ്വന്തം ട്രെയിനിൽ സായുധ അകമ്പടിയോടെയാണ് കിം ചൈനയിലെത്തിയത്.

സ്വകാര്യ ജെറ്റിൽ പറക്കുന്ന മിക്കവാറും ലോക നേതാക്കളിൽ നിന്ന് വ്യത്യസ്തമായി വേഗത കുറഞ്ഞ, പരമ്പരാഗത യാത്രാ മാർഗമായ, എന്നാൽ കനത്ത സുരക്ഷയുള്ളതുമായ ട്രെയിനാണ് കിം യാത്രക്കായി തിരഞ്ഞെടുക്കുന്നത്. 2011ൽ കിം അധികാരമേറിയതുമുതൽ, പച്ചയും മഞ്ഞയും നിറത്തിലുള്ള ഈ ട്രെയിൻ ലോകത്തിന് അത്ഭുതമാണ്. എല്ലാ സുരക്ഷാസംവിധാനങ്ങളോടും കൂടിയ വിമാനയാത്ര ഒഴിവാക്കി കിം ട്രെയിൻ തിരഞ്ഞെടുക്കുന്നതിന് പിന്നിൽ ചരിത്ര പ്രാധാന്യമുള്ള കാരണങ്ങളുണ്ട്.

ഇതിൽ ഒരു കാരണം കുടുംബചരിത്രമാണ്. കിമ്മിന്റെ പിതാവ് കിം ജോംഗ് ഇല്ലും മുത്തച്ഛൻ കിം ഇൽ സുംഗും വിമാനയാത്രയെ ഭയപ്പെട്ടിരുന്നുവെന്ന് റിപ്പോർട്ടുകളുണ്ട്. 1982ൽ അവരുടെ ജെറ്റിന്റെ പരീക്ഷണ പറക്കലിനിടെ ഒരു സ്ഫോടനം കണ്ടപ്പോഴാണ് ഈ ഭയം ആരംഭിച്ചതെന്ന് ദക്ഷിണ കൊറിയൻ മാദ്ധ്യമങ്ങൾ റിപ്പോർട്ട് ചെയ്യുന്നു. നാല് വർഷത്തിന് ശേഷം, കിം ഇൽ സുംഗ് സോവിയറ്റ് യൂണിയനിലേക്ക് നടത്തിയതായിരുന്നു അവസാന വിമാനയാത്ര. അതിനുശേഷം, ഉത്തരകൊറിയൻ നേതാക്കൾ വിമാനയാത്ര പൂർണമായും ഉപേക്ഷിച്ചതായാണ് മാദ്ധ്യമങ്ങൾ റിപ്പോർട്ട് ചെയ്തത്.

വിമാന യാത്രകൾ പൂർണമായി ഒഴിവാക്കിയ കിം ജോംഗ് ഇൽ, ചൈനയിലേക്കും റഷ്യയിലേക്കും കവചിത ട്രെയിനിൽ മാത്രമായിരുന്നു പിന്നീട് സന്ദർശനം നടത്തിയത്. അദ്ദേഹം 2001ൽ നടത്തിയ യാത്ര ഏറെ ചർച്ചയായിരുന്നു. ഉത്തര കൊറിയൻ തലസ്ഥാനമായ പ്യോംഗ്‌യാംഗിൽ നിന്ന് റഷ്യൻ തലസ്ഥാനമായ മോസ്കോയിലേക്ക് 20,000 കിലോമീറ്റർ ദൈർഘ്യമുള്ള യാത്ര നടത്തിയാണ് അദ്ദേഹം ലോകത്തെ ഞെട്ടിച്ചത്. ഏകദേശം 24 ദിവസമാണ് അദ്ദേഹം റഷ്യൻ യാത്രക്കായി ചെലവഴിച്ചത്. തന്റെ അവസാന നാളുകളിലും അദ്ദേഹം ട്രെയിൻ യാത്ര ഉപേക്ഷിച്ചില്ല. 2011ൽ ട്രെയിൻ യാത്രക്കിടെയാണ് അദ്ദേഹം ഹൃദയാഘാതം മൂലം മരിച്ചത്.

കുടുംബചരിത്രത്തിന് പുറമെ ഉത്തരകൊറിയൻ നേതാക്കൾ ട്രെയിൻ യാത്ര തിരഞ്ഞെടുക്കാനുള്ള മറ്റൊരു കാരണം സുരക്ഷയാണ്. പതിറ്റാണ്ടുകളായി ഉത്തരകൊറിയൻ നേതാക്കൾ മന്ദഗതിയിലുള്ളതും എന്നാൽ ശക്തമായതുമായ റെയിൽ ശൃംഖലയെയാണ് യാത്രക്കായി തിരഞ്ഞെടുക്കുന്നത്. രാജ്യത്തെ പഴയ വിമാനങ്ങളുമായി താരതമ്യം ചെയ്യുമ്പോൾ, കവചിത ട്രെയിൻ കൂടുതൽ സുരക്ഷയും സുഖമായ യാത്രയും ലഭ്യമാക്കുന്നു.

ഉത്തരകൊറിയൻ നേതാക്കൾ ട്രെയിൻ യാത്ര തിര‌ഞ്ഞെടുക്കുന്നതിന് പിന്നിൽ തന്ത്രപരമായ നേട്ടവുമുണ്ട്. പറക്കലിനിടെ വിമാനം ആക്രമിക്കപ്പെട്ടാൽ, അതിജീവനത്തിനുള്ള സാദ്ധ്യത വളരെ കുറവായിരിക്കും. എന്നാൽ ട്രെയിനിന് വേഗത കുറവാണെങ്കിലും, അതിജീവനത്തിനുള്ള സാദ്ധ്യത കൂടുതലാണ്. മാത്രമല്ല നേതാവിന്റെ നീക്കങ്ങൾ ശത്രുക്കൾക്കടക്കം പ്രവചിക്കാനും പ്രയാസകരമാകുന്നു. മാത്രമല്ല, ട്രെയിൻ യാത്രയിൽ റൂട്ടുകൾ മാറ്റാനും സ്റ്റോപ്പുകൾ ക്രമീകരിക്കാനും കഴിയും. മാത്രമല്ല, ലക്ഷ്യസ്ഥാനത്ത് എത്തുന്ന കൃത്യമായ സമയം വളരെ അപൂർവമായി മാത്രമേ മറ്റുള്ളവർക്ക് കണ്ടുപിടിക്കാൻ സാധിക്കുകയുള്ളൂ.