തിരുവനന്തപുരം: വാഴപ്പഴത്തില്‍ നിന്ന് നിര്‍മ്മിക്കുന്ന വിനാഗിരി, നൂഡില്‍സ്, സോസ്, ചട്നി, വൈന്‍, കൊഴുപ്പ് കുറഞ്ഞ ചിപ്സ് തുടങ്ങിയ ഉത്പന്നങ്ങള്‍ കുടുംബശ്രീ വിപണിയിലെത്തിക്കുന്നു. ട്രിച്ചിയിലെ നാഷണല്‍ റിസര്‍ച്ച് സെന്റര്‍ ഫോര്‍ ബനാനയുടെ(എന്‍.ആര്‍.സി.ബി) സാങ്കേതികവിദ്യ ഉപയോഗപ്പെടുത്തിയാണ് ഉത്പന്നങ്ങള്‍ നിര്‍മ്മിക്കുന്നത്. വിളവെടുപ്പ്, പാകപ്പെടുത്തല്‍, പായ്ക്കിംഗ്, സ്റ്റോറേജ് തുടങ്ങിയ ഘട്ടങ്ങളില്‍ എന്‍.ആര്‍.സി.ബിയുടെ സാങ്കേതികവിദ്യ ഉപയോഗിക്കുന്നതിനാല്‍ കയറ്റുമതി എളുപ്പമാകും. ആഭ്യന്തര, വിദേശ വിപണികളില്‍ വാഴയില ലഭ്യമാക്കാനും പദ്ധതിയുണ്ട്.
ഓരോ ജില്ലയിലെയും പ്രോജക്ട് മാനേജര്‍മാര്‍ക്കും ബ്‌ളോക് കോ- ഓഡിനേറ്റര്‍മാര്‍ക്കും കുടുംബശ്രീ സംരംഭകര്‍ക്കും ഇതിനായുള്ള പരിശീലനം എന്‍.ആര്‍.സി.ബിയില്‍ ആരംഭിച്ചു. അടുത്ത ഘട്ടത്തില്‍ കുടുംബശ്രീ അംഗങ്ങള്‍ക്ക് ഇവര്‍ പരിശീലനം നല്‍കും. വാഴപ്പഴ ഉത്പന്നങ്ങളുടെ സംരംഭങ്ങള്‍ തുടങ്ങാന്‍ അംഗങ്ങള്‍ക്ക് കുടുംബശ്രീ സാമ്പത്തിക സഹായവും നല്‍കും.
വൈവിദ്ധ്യമാര്‍ന്ന ഉത്പന്നങ്ങള്‍
ബനാന ജ്യൂസ്, സിപ് അപ്, സിറപ്പ്, ഡെസേര്‍ട്ട്, ഗ്‌ളൈസെമിക് ഇന്‍ഡെക്‌സ് കുറഞ്ഞ പാസ്ത, ഏത്തയ്ക്ക തൊലി അച്ചാര്‍, വാഴപ്പിണ്ടി അച്ചാര്‍, വാഴപ്പിണ്ടി സൂപ്പ് മിക്‌സ്, ബേബി ഫുഡ്, ഫ്രൂട്ട് ബാര്‍, ബനാന കുറുക്ക്, ന്യൂട്രി ബാര്‍, ബ്രഡ്, പിസ, കുക്കീസ്, കൊഴുപ്പ് കുറഞ്ഞ യോഗര്‍ട്ട്, വാഴപ്പൂവില്‍ നിന്ന് ഹെല്‍ത്ത് മിക്‌സ് തുടങ്ങിയ നിരവധി ഉത്പന്നങ്ങളാണ് കുടുംബശ്രീ വിപണിയിലെത്തിക്കുന്നത്.
വാഴകൃഷിയിലൂടെയും മൂല്യവര്‍ദ്ധിത ഉത്പന്നങ്ങളിലൂടെയും ആഗോള വിപണിയില്‍ സാന്നിദ്ധ്യമുറപ്പിക്കാനാണ് കുടുംബശ്രീയുടെ ശ്രമം.
ഡോ. എസ്. ഷാനവാസ്- സംസ്ഥാന പ്രോഗ്രാം ഓഫീസര്‍, കുടുംബശ്രീ