ജി.എസ്.ടി ഇളവ് നേട്ടം നേട്ടമാകും
കൊച്ചി: കേന്ദ്ര സര്‍ക്കാര്‍ പ്രഖ്യാപിച്ച ചരക്കു സേവന നികുതി(ജി.എസ്.ടി) ഇളവിന്റെ നേട്ടം ഉപഭോക്താക്കള്‍ക്ക് കൈമാറാന്‍ വാഹനങ്ങളുടെ വില കുറച്ച് പ്രമുഖ കാര്‍ കമ്പനികള്‍. ടാറ്റ മോട്ടോര്‍സ്, മഹീന്ദ്ര ആന്‍ഡ് മഹീന്ദ്ര, ഹ്യുണ്ടായ്, ടൊയോട്ട, ബി.എം.ഡബ്ള്യു തുടങ്ങിയ കമ്പനികള്‍ കഴിഞ്ഞ ദിവസങ്ങളില്‍ വിവിധ മോഡല്‍ വാഹനങ്ങളുടെ വിലയില്‍ കുറച്ചു. ചെറിയ കാറുകളുടെ നികുതി 28 ശതമാനത്തില്‍ നിന്ന് 18 ശതമാനമായി കുറയ്ക്കാന്‍ കഴിഞ്ഞ ദിവസം നടന്ന ജി.എസ്.ടി കൗണ്‍സില്‍ അന്തിമ അനുമതി നല്‍കിയിരുന്നു. സെപ്തംബര്‍ 22 മുതലാണ് പുതിയ നിരക്കുകള്‍ പ്രാബല്യത്തിലാകുന്നത്. എസ്.യു.വികളുടെ നികുതി 40 ശതമാനമായി ഉയര്‍ത്തിയെങ്കിലും സെസ് ഒഴിവാക്കിയതിനാല്‍ വില കുറയും. ഇലക്ട്രിക് കാറുകളുടെ ജി.എസ്.ടി അഞ്ച് ശതമാനത്തില്‍ തുടരും.
ആള്‍ട്ടോ കെ10 മുതല്‍ വാഗണര്‍ തുടങ്ങിയ കാറുകളുടെ വിലയില്‍ ഗണ്യമായ കുറവുണ്ടാകുമെന്ന് മാരുതി സുസുക്കി ചെയര്‍മാന്‍ ആര്‍. സി ഭാര്‍ഗവ സൂചന നല്‍കി.
1.ഹ്യുണ്ടായ് വിവിധ മോഡലുകളുടെ വില 60,000 രൂപ മുതല്‍ 2.4 ലക്ഷം രൂപ വരെ കുറയും
2. ടാറ്റ മോട്ടോര്‍സിന്റെ വിവിധ വാഹനങ്ങള്‍ക്ക് 65,000 രൂപ മുതല്‍ 1.55 ലക്ഷം രൂപ വരെ താഴും
3. ടൊയോട്ട ഫോര്‍ച്യൂണറിന് 3.49 ലക്ഷം രൂപയും ഇന്നോവ ക്രിസ്റ്റയ്ക്ക് 1.8 ലക്ഷം രൂപയും കുറയും
4. മഹീന്ദ്ര ഥാര്‍, സ്‌കോര്‍പ്പിയോ, എക്സ്.യു.വി700 എന്നിവയുടെ വിലയില്‍ 1.56 ലക്ഷം രൂപ കുറയും
വിലയിലുണ്ടാകുന്ന കുറവ്
ടിയാഗോ: 75,000 രൂപ
ആള്‍ട്രോസ്: 1.1 ലക്ഷം രൂപ
നെക്സോണ്‍: 1.55 ലക്ഷം രൂപ
മഹീന്ദ്ര ബലോറോ: 1.27 ലക്ഷം രൂപ
ഥാര്‍ റോക്‌സ്: 1.33 ലക്ഷം രൂപ
ടൊയോട്ട ഗ്‌ളാന്‍സ: 85,300 രൂപ
ഹ്യുണ്ടായ് ക്രെറ്റ: 72,000 രൂപ