കാസർകോട്: ഭക്ഷണം തൊണ്ടയിൽ കുടുങ്ങി മദ്ധ്യവയസ്‌കൻ മരിച്ചു. കാസർകോട് ബദിയടുക്കയിൽ ആണ് സംഭവം. വെൽഡിംഗ് തൊഴിലാളിയായ ബാറടുക്ക ചുള്ളിക്കാന ഹൗസിൽ വിശാന്തി ഡി. സൂസ (52) ആണ് മരിച്ചത്. ഇന്നലെ വൈകിട്ട് നാലരയോടെയായിരുന്നു സംഭവം.

കാസർകോട് ബാറടുക്കയിലെ തട്ടുകടയിൽ നിന്ന് ഓംലറ്റും പഴവും കഴിക്കുന്നതിനിടെ ഭക്ഷണം തൊണ്ടയിൽ കുടുങ്ങി ശ്വാസതടസം നേരിടുകയായിരുന്നു. പിന്നാലെ സ്ഥലത്തുണ്ടായിരുന്നവർ ചേർന്ന് കാസർകോട് ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭക്ഷണം തൊണ്ടയിൽ കുടുങ്ങിയതാണ് മരണകാരണമെന്നാണ് പ്രാഥമിക റിപ്പോർട്ട്. സംഭവത്തിൽ ബദിയടുക്ക പൊലീസ് അസ്വാഭാവിക മരണത്തിന് കേസെടുത്തു.

പരേതരായ പോക്കറായിൽ ഡി. സൂസയുടെയും ലില്ലി ഡി. സൂസയുടെയും ഏകമകനാണ് വിശാന്തി. അവിവാഹിതനാണ്. കട്ടത്തടുക്കയിലെ വെൽഡിംഗ് കടയിൽ സഹായിയായി ജോലി ചെയ്യുകയായിരുന്നു.