മുംബയ്: നവരാത്രി, ദസറ, ദീപാവലി തുടങ്ങിയ ആഘോഷ വേളകളിൽ സ്വർണ്ണത്തിന്റെ ആവശ്യം കുത്തനെ ഉയരാറുണ്ട്. ഇത് പരമ്പരാഗതമായ കൊടുക്കൽ വാങ്ങലുകൾ, വിവാഹങ്ങൾ, സമ്മാനം നൽകൽ എന്നിവ മൂലമാണ് സംഭവിക്കുന്നത്. ഈ ആവശ്യം സ്വർണ്ണവിലയെ മുകളിലേക്ക് എത്തിക്കുകയും ചെയ്യുന്നു. എന്നാൽ, ഈ വില വർദ്ധനവ് പലപ്പോഴും സീസണൽ പ്രീമിയം (താൽക്കാലികമായ അധിക വില) മാത്രമാകാനുള്ള സാദ്ധ്യതയുണ്ടെന്നതിനാൽ നിക്ഷേപകർ ജാഗ്രത പാലിക്കണം.
സാമ്പത്തിക അനിശ്ചിതത്വങ്ങൾ നിലനിൽക്കുന്ന സാഹചര്യത്തിൽ ഉത്സവ സീസണുകളിൽ സ്വർണ്ണത്തെയും വെള്ളിയെയും നിക്ഷേപകർ എങ്ങനെ സമീപിക്കണം എന്നതിനെക്കുറിച്ച് മാർഗ്ഗനിർദ്ദേശങ്ങൾ നൽകുകയാണ് വിദഗ്ദ്ധർ. സുരക്ഷിത നിക്ഷേപം എന്ന നിലയിൽ സ്വർണ്ണം അവയുടെ സ്ഥാനം നിലനിർത്തുമ്പോൾ വ്യാവസായിക വളർച്ചയിൽ പ്രതീക്ഷയർപ്പിക്കുന്നവർക്ക് വെള്ളിയിൽ സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ (എസ്ഐപി) വഴി നിക്ഷേപിക്കാം.
1.നിക്ഷേപം നടത്താൻ അനുയോജ്യമായ മാർഗങ്ങൾ
നിങ്ങളുടെ നിക്ഷേപത്തിന്റെ മുഖ്യഭാഗമായി സ്വർണ്ണത്തെ നിലനിർത്തുക. ഇത് സാമ്പത്തിക സുരക്ഷിതത്വത്തിന് സുരക്ഷിത താവളമായി പ്രവർത്തിക്കും. ഉയർന്ന നേട്ടങ്ങൾക്കായി തന്ത്രപരമായ തിരഞ്ഞെടുപ്പ് എന്ന നിലയിൽ വെള്ളിയിൽ എസ്ഐപി വഴി നിക്ഷേപിച്ച് വളർച്ചാ സാദ്ധ്യതകൾ ഉപയോഗപ്പെടുത്താം.
2. ഘട്ടം ഘട്ടമായുള്ള നിക്ഷേപം
ഉത്സവത്തിന് മുന്നോടിയായി ഭീമൻ തുകകൾ ഒന്നിച്ചു നിക്ഷേപിക്കുന്നതിന് പകരം, പ്രതിമാസം അല്ലെങ്കിൽ ആഴ്ചതോറും ഘട്ടം ഘട്ടമായി സ്വർണ്ണം വാങ്ങുന്ന കാര്യം പരിഗണിക്കുക. ഇത് ഉയർന്ന വിലയ്ക്ക് വാങ്ങാനുള്ള സാദ്ധ്യതകൾ കുറയ്ക്കുകയും ശരാശരി ചെലവുകൾ ചിട്ടപ്പെടുത്താൻ സഹായിക്കുകയും ചെയ്യും.
3. ഉൽപ്പന്ന തരവും ചെലവും ശ്രദ്ധിക്കുക
ആഭരണം,നാണയം പോലുള്ള സ്വർണ്ണം വാങ്ങിയാൽ പണിക്കൂലിയും സൂക്ഷിക്കാനുള്ള ബുദ്ധിമുട്ടുകളും ഉണ്ടാകും. അതുകൊണ്ട്, കുറഞ്ഞ ചെലവിൽ സ്വർണ്ണത്തിൽ നിക്ഷേപിക്കാൻ ഇടിഎഫുകളോ, എസ്ജിബികളോ, ഡിജിറ്റൽ ഗോൾഡോ തിരഞ്ഞെടുക്കുന്നതാണ് നല്ലത്. വെള്ളിയിലും കുറഞ്ഞ ഫീസ് ഈടാക്കുന്ന, വേഗത്തിൽ വിറ്റഴിക്കാവുന്ന ഉൽപ്പന്നങ്ങൾ തിരഞ്ഞെടുക്കുന്നതാണ് ഉചിതം.
നിക്ഷേപത്തിലെ പ്രധാന വെല്ലുവിളികൾ
ഉത്സവ സീസണുകളിൽ സ്വർണ്ണത്തിന് വില കൂടുന്നത് പലപ്പോഴും യഥാർത്ഥ മൂല്യം വർദ്ധിച്ചതുകൊണ്ടല്ല. മറിച്ച് പെട്ടെന്നുള്ള ആവശ്യം കണക്കിലെടുത്ത് വാങ്ങാനുള്ള തിടുക്കമാണ് ഇതിനു പിന്നിലെ കാരണം. ഇതിനെത്തുടർന്ന് നിക്ഷേപകർ അധിക തുക നൽകേണ്ടി വരും. അതുകൊണ്ട്, ഈ വിലവർദ്ധനവ് താൽക്കാലികമായി കണക്കാക്കാവുന്നതാണ്. ഉയർന്ന വിലയ്ക്ക് വാങ്ങിയാൽ ഉത്സവത്തിന് ശേഷം വില കുറഞ്ഞേക്കാം.
വെള്ളിക്ക് വ്യാവസായിക ആവശ്യകത കൂടുതലായതിനാൽ, ഉൽപ്പാദന മേഖലയിലെ മാന്ദ്യം അവയുടെ പ്രകടനത്തെ പ്രതികൂലമായി ബാധിച്ചേക്കാം. വിദഗ്ദ്ധരുടെ അഭിപ്രായത്തിൽ, നിലവിലെ സാഹചര്യങ്ങളും സാമ്പത്തിക പശ്ചാത്തലവും കണക്കിലെടുക്കുമ്പോൾ സ്വർണ്ണം ഒരു സുരക്ഷിത ഉത്സവ നിക്ഷേപമായി തുടരുന്നുണ്ട്. വില വർദ്ധനവിന് ശേഷം ലാഭമുണ്ടാകാനുള്ള സാദ്ധ്യതയുണ്ടെന്നും അവർ മുന്നറിയിപ്പ് നൽകുന്നു. വലിയ തുക ഒറ്റയടിക്ക് നിക്ഷേപിക്കാതെ എസ്ഐപി പോലുള്ള ചിട്ടയായ വാങ്ങൽ രീതികൾ ഉപയോഗിക്കുക. സ്വർണ്ണത്തിലും വെള്ളിയിലുമുള്ള നിക്ഷേപം നിങ്ങളുടെ മൊത്തം പോർട്ട്‌ഫോളിയോയുടെ 5-15 ശതമാനം (റിസ്ക് എടുക്കാനുള്ള ശേഷി അനുസരിച്ച്) എന്ന പരിധിയിൽ നിർത്തുക.
ഉത്സവ സീസണുകളെ മാത്രം അടിസ്ഥാനമാക്കി വാങ്ങൽ തീരുമാനങ്ങൾ എടുക്കാതെ, നിങ്ങളുടെ സാമ്പത്തിക ലക്ഷ്യങ്ങൾക്കും പോർട്ട്‌ഫോളിയോ ബാലൻസിനും അനുസരിച്ച് നിക്ഷേപം നടത്തണം. ഈ വർഷത്തെ ആഗോള പലിശ നിരക്കുകളും പണപ്പെരുപ്പവും കൂടുതൽ അനിശ്ചിതത്വത്തിലായതിനാൽ, സ്വർണ്ണത്തിലും വെള്ളിയിലും നിക്ഷേപം നടത്തുമ്പോൾ ബുദ്ധിപൂർവ്വം റിസ്ക് മാനേജ് ചെയ്യുകയും ദീർഘകാല ലക്ഷ്യങ്ങളിൽ ശ്രദ്ധ കേന്ദ്രീകരിക്കുകയും വേണമെന്നാണ് വിദഗ്ദ്ധർ ഓർമ്മിപ്പിക്കുന്നത്.