നടനും തിരക്കഥാകൃത്തുമായ കിച്ചു ടെല്ലസും നടി റോഷ്ന ആൻ റോയിയും വിവാഹമോചിതരായി. അഞ്ച് വർഷത്തെ ദാമ്പത്യജീവിതത്തിന് ശേഷമാണ് ഇരുവരും പിരിയുന്നത്. സോഷ്യൽ മീഡിയയിൽ പങ്കുവച്ച കുറിപ്പിൽ നടി റോഷ്ന തന്നെയാണ് ഇക്കാര്യം അറിയിച്ചത്. കിച്ചുവും ഞാനും ഒരു കാലത്ത് ഒരുമിച്ചായിരുന്നു. ഇപ്പോൾ വഴിപിരിഞ്ഞു. ജീവിതം ഇനിയും മുന്നോട്ടു പോകേണ്ടതുണ്ട്. ഈ യാത്രയിൽ ഒപ്പമുണ്ടായിരുന്ന എല്ലാവർക്കും നന്ദിയെന്ന് നടി കുറിച്ചു. ഞങ്ങളുടെ സ്വകാര്യതയെ മാനിക്കാനും വേർപിരിഞ്ഞ് സമാധാനമായി ജീവിക്കാനും അനുവദിക്കണമെന്നും നടി സോഷ്യൽ മീഡിയയിൽ പങ്കുവച്ച കുറിപ്പിൽ വ്യക്തമാക്കി.

നടി പങ്കുവച്ച കുറിപ്പ് ഇങ്ങനെ
'സോഷ്യൽ മീഡിയയിൽ ആഘോഷിക്കാൻ വേണ്ടിയല്ല ഇക്കാര്യം ഞാൻ പറയുന്നത്. പക്ഷേ, വെളിപ്പെടുത്താൻ ഇതാണ് ശരിയായ സമയമെന്ന് എനിക്ക് തോന്നുന്നു. ഞങ്ങൾ രണ്ടു പേരും ജീവനോടെ ഉണ്ട്, രണ്ട് വ്യത്യസ്തമായ വഴികളിലൂടെ സമാധാനത്തോടെ ഞങ്ങൾക്ക് ജീവിതം തുടരേണ്ടതുണ്ട്. ശരിയാണ്, എന്തു പറഞ്ഞാലും രക്തബന്ധമാണല്ലോ എല്ലാത്തിലും വലുത്. അതുകൊണ്ടാണ് ഞാൻ വഴി മാറിയത്. നിങ്ങൾ ആഗ്രഹിക്കുന്ന ഇടം നൽകുകയും ചെയ്തു. ഞാൻ സ്വതന്ത്രയാണ്. അദ്ദേഹം സ്വതന്ത്രനാണ്. എല്ലാവർക്കും ഞാൻ സമാധാനം ആശംസിക്കുന്നു.

ഇക്കാര്യം പുറത്തു വന്നു പറയുക എന്നത് എളുപ്പമായിരുന്നില്ല. ചിലർക്ക് സന്തോഷമായേക്കാം. അവരുടെ ആ സന്തോഷം തുടരട്ടെ എന്ന് ഞാൻ ആത്മാർഥമായി പ്രാർത്ഥിക്കുന്നു. പല കാര്യങ്ങൾ കൊണ്ടും ഞങ്ങൾ വളരെ അടുത്ത സുഹൃത്തുക്കളായിരുന്നു. ഇപ്പോഴും അങ്ങനെയാണ്. കിച്ചുവും ഞാനും ഒരു കാലത്ത് ഒരുമിച്ചായിരുന്നു. ഇപ്പോൾ വഴിപിരിഞ്ഞു. ജീവിതം ഇനിയും മുന്നോട്ടു പോകേണ്ടതുണ്ട്. ഈ യാത്രയിൽ ഒപ്പമുണ്ടായിരുന്ന എല്ലാവർക്കും നന്ദി. ഇക്കാര്യം മറച്ചു വയ്ക്കാൻ ഞാൻ ആഗ്രഹിക്കുന്നില്ല. എല്ലാവരോടും ഒരു അപക്ഷയുണ്ട്, ഞങ്ങളുടെ സ്വകാര്യതയെ മാനിക്കാനും വേർപിരിഞ്ഞ് സമാധാനമായി ജീവിക്കാനും അനുവദിക്കണം.'

ഒരു ആമുഖ കുറിപ്പ് പങ്കുവച്ചുകൊണ്ടാണ് നടി ഇക്കാര്യം തുറന്നുപറഞ്ഞത്. ആ കുറിപ്പ് ഇങ്ങനെ

'ഒരുമിച്ചുള്ള അഞ്ച് അത്ഭുതകരമായ വർഷങ്ങൾക്ക് ശേഷം, സ്‌നേഹത്തോടും ബഹുമാനത്തോടും കൂടി ഞങ്ങൾ വേർപിരിയാൻ തീരുമാനിച്ചു. ഓർമ്മകൾക്ക് നന്ദി, ഞങ്ങളുടെ ജീവിതത്തിൽ പുതിയ അദ്ധ്യായം ആരംഭിക്കുമ്പോൾ നിങ്ങളുടെ പ്രാർത്ഥനയും സ്വകാര്യതയും ഞങ്ങൾ അഭ്യർത്ഥിക്കുന്നു.

അതെ, എല്ലാത്തിനേക്കാൾ വലുത് രക്തബന്ധമാണ്. അതുകൊണ്ടാണ് ഞാൻ മാറി നിന്ന് നിങ്ങൾക്ക് ആവശ്യമുള്ള എല്ലാ ഇടവും നൽകിയത്. ഞാൻ സ്വതന്ത്രനാണ്, അദ്ദേഹം സ്വതന്ത്രനാണ്, എല്ലാവർക്കും സമാധാനം ആശംസിക്കുന്നു.

ഞങ്ങൾ വളരെ അടുത്ത സുഹൃത്തുക്കളായിരുന്നു, പല തരത്തിലും ഞങ്ങൾ ഇപ്പോഴും അങ്ങനെ തന്നെ. എന്റെ അച്ഛനെ നഷ്ടപ്പെട്ട ദിവസമായിരുന്നു സെപ്റ്റംബർ 30. ജീവിതത്തിൽ അനുഭവിച്ച ആദ്യ വേദന. ഇന്ന് ഞാൻ മറ്റൊരു കാര്യത്തിന് അന്ത്യം കുറിക്കുന്നു. മുന്നോട്ടേക്ക് ചുവടുവയ്ക്കുന്നു. നഷ്ടത്തിൽ നിന്ന് നഷ്ടത്തിലേക്ക്, ഞാൻ ഉയരാൻ തീരുമാനിക്കുന്നു.

ഒമർ ലുലു സംവിധാനം ചെയ്ത അടാർ ലൗവിലൂടെ ശ്രദ്ധേയയായ നടിയാണ് റോഷ്ന. അങ്കമാലി ഡയറീസ് എന്ന ചിത്രത്തിലൂടെ പ്രേക്ഷകർക്ക് പ്രിയങ്കരനായ നടനാണ് കിച്ചു ടെല്ലസ്.