കോഴഞ്ചേരി: ജില്ലാ ആശുപത്രിയിൽ നിർമ്മാണം പൂർത്തിയാക്കിയ ലക്ഷ്യ നിലവാരത്തിലുള്ള ലേബർ റൂം & ഓപ്പറേഷൻ തിയറ്റർ, നേത്ര വിഭാഗം (ഡെഡിക്കേറ്റഡ് ഐ യൂണിറ്റ്), വയോജന വാർഡ് എന്നിവയുടെ ഉദ്ഘാടനം, ജില്ലാ ടി.ബി. സെന്ററിനായി നിർമ്മിക്കുന്ന പുതിയ കെട്ടിടത്തിന്റെ നിർമ്മാണ ഉദ്ഘാടനം എന്നിവ 3 ന് വൈകിട്ട് 3 മണിക്ക് മന്ത്രി വീണാ ജോർജ് നിർവഹിക്കും. . കിഫ്ബിയിലൂടെ 30.25 കോടി രൂപ മുതൽ മുടക്കി നിർമ്മിക്കുന്ന ഒ.പി. ബ്ലോക്കിന്റെ നിർമ്മാണം 80 ശതമാനത്തോളം പൂർത്തിയായിട്ടുണ്ട്. 2.62 കോടി രൂപ ചെലവിൽ രണ്ട് നിലകളിലായി 11900 ചതുരശ്ര അടി വിസ്തീർണത്തിലാണ് ദേശീയ നിലവാരത്തിൽ ലക്ഷ്യ ലേബർ റൂം ഓപ്പറേഷൻ തിയേറ്റർ എന്നിവ സജ്ജീകരിച്ചിരിക്കുന്നത്. ഒന്നാംനിലയിൽ ആധുനിക രീതിയിലുള്ള മോഡുലാർ ഓപ്പറേഷൻ തീയറ്റർ, 4 ലേബർ സ്യൂട്ട്, വെയിറ്റിംഗ് ഏരിയ, എൻഐസിയു, റിസപ്ഷൻ, ട്രയാജ് റൂം, നഴ്സിംഗ് സ്റ്റേഷൻ, ഡൈനിംഗ് ഏരിയ, വാഷിംഗ് ഏരിയ എന്നിവയാണുള്ളത്. രണ്ടാം നിലയിൽ ആന്റിനേറ്റൽ വാർഡ്, പോസ്റ്റ്‌നേറ്റൽ വാർഡ്, പോസ്റ്റ് ഓപ്പറേറ്റീവ് റൂം, എച്ച്.ഡി.യു, ഐസോലേഷൻ റൂം, ഡോക്ടേഴ്സ് റൂം എന്നിവയാണുള്ളത്. 1.2 കോടി രൂപ ചെലവഴിച്ച് നിർമ്മിച്ച വയോജന വാർഡിൽ 14 കിടക്കകളോട് കൂടിയ സൗകര്യവും ഏർപ്പെടുത്തിയിട്ടുണ്ട്. 1.3 കോടി രൂപ മുതൽ മുടക്കിൽ നേത്ര രോഗ വിഭാഗം ഡെഡിക്കേറ്റഡ് യൂണിറ്റിന്റെ ഭാഗമായി നേത്ര വാർഡ്, ഒ.പി, ഓപ്പറേഷൻ തിയേറ്റർ എന്നിവ സജ്ജമാക്കിയിട്ടുണ്ട്. 3 കോടി രൂപ മുതൽമുടക്കിലാണ് ജില്ലാ ടി.ബി സെന്റർ നിർമ്മിക്കുന്നത്. നാലുമുതൽ സംവിധാനങ്ങളെല്ലാം പ്രവർത്തനക്ഷമമാവുമെന്ന് ജില്ലാ പഞ്ചായത്ത് അദ്ധ്യക്ഷൻ ജോർജ് ഏബ്രഹാം ജില്ലാ ആശുപത്രി സൂപ്രണ്ട് ഡോ. നിധീഷ് ഗ്രാമ പഞ്ചായത്തംഗം ബിജിലി പി. ഈശോ എന്നിവർ അറിയിച്ചു.