കോന്നി : കോന്നി ഗ്രാമ പഞ്ചായത്ത് മാമൂട് വാർഡിലെ ബംഗ്ലാവ് മുരുപ്പ് പ്രദേശത്തെ ഏകദേശം 60 കുടുംബങ്ങൾക്ക് ശുദ്ധജലം എത്തിക്കുന്നതിനായി ബംഗ്ലാവ് മുരുപ്പ് കുടിവെള്ള പദ്ധതിയുടെ നിർമ്മാണ പ്രവർത്തനങ്ങൾ ഗ്രാമപഞ്ചായത്ത് പ്രസിഡന്റ് ആനി സാബു ഉദ്ഘാടനം ചെയ്തു. ജില്ലാ പഞ്ചായത്ത് മെമ്പർ റോബിൻ പീറ്റർ അദ്ധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്റ് റോജി ഏബ്രഹാം സ്ഥലം വിട്ടു നൽകിയ ബിന്ദുവിനെ ആദരിച്ചു. ഗ്രാമ പഞ്ചായത്ത് അംഗം സിന്ധു സന്തോഷ്, മുൻ ബ്ലോക്ക് പഞ്ചായത്ത് വൈസ് പ്രസിഡന്റ് , ചിറ്റൂർ ശങ്കർ, ബ്ലോക്ക് പഞ്ചായത്ത് അംഗങ്ങളായ ജോളി ഡാനിയേൽ, പ്രവീൺ പ്ലാവിളയിൽ, മുൻ ഗ്രാമ പഞ്ചായത്ത് പ്രസിഡന്റ് സുലേഖ വി.നായർ,തോമസ് കാലായിൽ, പി.വി ജോസഫ്, ഗ്രാമ പഞ്ചായത്ത് സെക്രട്ടറി ദീപു, ദീനാമ്മ റോയി, ശ്രീജ രാജൻ, സുബിൻ നെല്ലിമൂട്ടിൽ, അനിൽകുമാർ എന്നിവർ പ്രസംഗിച്ചു. കുടിവെള്ളത്തിന് ഏറെ ക്ഷാമം അനുഭവിക്കുന്ന പ്രദേശത്തെ കാലങ്ങളായുള്ള ആവശ്യത്തിനാണ് പരിഹാരമാകുന്നത്. കിണർ നിർമ്മിക്കുന്നതിന് പ്രദേശവാസിയായ കുരട്ടിയിൽ ബീന സ്ഥലം വിട്ടു നൽകിയതോടെയാണ് പദ്ധതി നടത്തിപ്പ് വേഗത്തിലായത്. തുടർന്ന് ടാങ്ക് നിർമ്മിക്കുന്നതിനായി വനം വകുപ്പിന്റെ സ്ഥലമായ ഐ.ബി പ്രദേശത്ത് സ്ഥലം കണ്ടെത്തുകയും സ്ഥലം ഗ്രാമ പഞ്ചായത്തിലേക്ക് വിട്ടു കിട്ടുന്നതിനായി ഗ്രാമ പഞ്ചായത്ത് അംഗം സിന്ധു സന്തോഷ് മുൻകൈയെടുത്തു നടത്തിയ പ്രവർത്തനത്തിന്റെ ഫലമായിട്ടാണ് പദ്ധതിയ്ക്ക് തുടക്കം കുറിയ്ക്കുവാൻ കഴിഞ്ഞത്. ആദ്യഘട്ടമായി ജില്ലാ - ഗ്രാമ പഞ്ചായത്തുകളുടെ 38, 40,000 രൂപ വകയിരുത്തിയാണ് കിണർ നിർമ്മാണവും അനുബന്ധ പ്രവർത്തനങ്ങളും നടക്കുന്നത്.

.............................

രണ്ടാം ഘട്ടമായി ബ്ലോക്ക് പഞ്ചായത്ത് 2025- 26 വാർഷിക പദ്ധതിയിൽ 15 ലക്ഷം രൂപ വകയിരുത്തിയിട്ടുണ്ട്.

അനിസാബു

(ഗ്രാമ പഞ്ചായത്ത് പ്രസിഡന്റ് )