അടൂർ : അടൂരിൽ എസ്.എൻ.ഡി.പി ശാഖാ സെക്രട്ടറിയുടെ അക്കൗണ്ടിൽ ആളുമാറി അരക്കോടി രൂപയെത്തിയത് ആശങ്ക സൃഷ്ടിച്ചു. അടൂർ നെല്ലിമുകൾ 3682-ാം ശാഖാ സെക്രട്ടറിയും ചക്കൂർച്ചിറ ക്ഷേത്ര ഭരണസമിതിയംഗവുമായ അരുൺ നിവാസിൽ അരുൺ നെല്ലിമുകളിന്റെ ഫെഡറൽ ബാങ്ക് അക്കൗണ്ടിലേക്കാണ് തുക എത്തിയത്. പണം തിരികെ നൽകാനുള്ള തയാറെടുപ്പിൽ യുവാവ്. അരുൺ നേരത്തെ ജോലി ചെയ്തിരുന്ന ബംഗ്ലൂരുവിലെ സ്വകാര്യ കമ്പനിയിൽ നിന്നുമാണ് പണം എത്തിയതെന്നാണ് വിവരം. വെള്ളിയാഴ്ച വൈകിട്ട് അഞ്ചിനാണ് 5353891 രൂപ എത്തിയത്. കമ്പനി ഉടമ അവരുടെ മറ്റൊരു അക്കൗണ്ടിലേക്ക് ട്രാൻസ്ഫർ ചെയ്തപ്പോൾ അബദ്ധത്തിൽ അരുണിന്റെ അക്കൗണ്ടിലേക്ക് എത്തുകയായിരുന്നു. ഫോണിൽ മെസേജ് വന്നത് ശ്രദ്ധിച്ചപ്പോഴാണ് അരുൺ പണം എത്തിയതറിഞ്ഞത്. അരുൺ ഉടൻ തന്നെ പണം അയച്ച കമ്പനിയുമായി ബന്ധപ്പെടുകയായിരുന്നു. തുടർന്ന് കമ്പനി അധികൃതർ തിരികെ അരുണിനെ വിളിച്ച് അബദ്ധം പറ്റിയതാണെന്ന് അറിയിച്ചു. ഇതോടെ പണം തിരികെ അയക്കാൻ വേണ്ടി തന്റെ ബാങ്കിലെ നിയമനടപടികൾക്കായി കത്ത് തരണമെന്ന് അരുൺ ആവശ്യപ്പെട്ടു. ഇതോടെ ഇമെയിലിൽ കത്ത് ലഭിക്കുകയും തിങ്കളാഴ്ച വരെ ബാങ്ക് അവധി ആയതിനാൽ ചൊവ്വാഴ്ച തന്റെ അക്കൗണ്ടിലേക്ക് വന്ന മുഴുവൻ പണവും ആർ.ജി.ടി.എസ് വഴി തിരികെ അയക്കുമെന്നും അരുൺ കമ്പനി അധികൃതരെ അറിയിച്ചിട്ടുണ്ട്.