കൊല്ലം: കുട്ടികൾക്കായി പൂതക്കുളം ഗ്രാമ പഞ്ചായത്ത് ഒരുക്കുന്ന ഹാപ്പിനസ് പാർക്കിന്റെ നിർമ്മാണം അവസാനഘട്ടത്തിലെത്തി​.

പൂതക്കുളം പാണാട്ട്ചിറയുടെ തീരത്താണ് ഹാപ്പിനസ് പാർക്കിന്റെ നിർമ്മാണം പുരോഗമിക്കുന്നത്. പാർക്കിലെ കെട്ടിടങ്ങളുടെ ഉൾപ്പെടെ പെയിന്റിംഗ്, ഇന്റർലോക്ക് പാകൽ, ഫെൻസിംഗ് നിർമ്മാണം എന്നിവ പൂർത്തിയായി. ഈ മാസം തന്നെ പാർക്ക് തുറക്കാനാണ് ശ്രമിക്കുന്നതെന്ന് പഞ്ചായത്ത് അധികൃതർ പറഞ്ഞു.

എല്ലാ തദ്ദേശ സ്ഥാപനങ്ങളിലും ഹാപ്പിനസ് പാർക്കുകൾ സ്ഥാപിക്കണമെന്നത് സർക്കാർ നി​ലപാടാണ്. ടൂറിസം വകുപ്പിന്റെ നേതൃത്വത്തിലാണ് പൂതക്കുളത്ത് ഹാപ്പിനസ് പാർക്ക് നിർമ്മാണം പുരോഗമി​ക്കുന്നത്. 'കുട്ടികളുടെ പാർക്കിലെ അടിസ്ഥാന സൗകര്യ വികസനം' പദ്ധതി പ്രകാരമാണ് പാർക്കിന്റെ ആദ്യഘട്ട പ്രവർത്തനങ്ങൾ നടപ്പാക്കിയത്. പാട്ടും കലാപരിപാടികളും അവതരിപ്പിക്കാനുമുള്ള ഇടമായാണ് പാർക്ക് വികസിപ്പി​ക്കുന്നത്. സ്വകാര്യ ചടങ്ങുകളും യോഗങ്ങളും സംഗമങ്ങളും നടത്താൻ അവസരമൊരുങ്ങും. കുട്ടികൾക്ക് മാത്രമല്ല ഏത് പ്രായക്കാർക്കും വിശ്രമിക്കാനും സമയം ചെലവഴിക്കാനുമുള്ള അന്തരീക്ഷമാണ് സജ്ജമാകുന്നത്. വിനോദ സഞ്ചാരവകുപ്പിന്റെ 49 ലക്ഷവും ഇത്തിക്കര ബ്ലോക്കിന്റെതും പൂതക്കുളം ഗ്രാമപഞ്ചായത്തിന്റെയും 5 ലക്ഷം വീതവും വിനിയോഗിച്ചാണ് പാർക്ക് നിർമ്മാണം.

മാനസികോല്ലാസം പ്രധാനം

 കുട്ടികളുടെ ക്ഷേമത്തിനും കായിക, മാനസിക ഉല്ലാസത്തിനും പ്രാധാന്യം നൽകിയാണ് പാർക്ക് ഒരുക്കുന്നത്

 ഉല്ലാസ, വിശ്രമ സൗകര്യങ്ങളുണ്ട്.

 കളിക്കാനുള്ള ഉപകരണങ്ങൾ, സെൽഫി പോയിന്റ്, മൈക്ക് സെറ്റ്, ലൈറ്റ്, കഫ്റ്റീരിയ, സ്റ്റേജ് എന്നി​വയും

 ടേക് എ ബ്രേക്കിന്റെ രണ്ട് ടോയ്‌ലറ്റുകളും ലൈറ്റ് റിഫ്രഷ്‌മെന്റ് ഏരിയയും ഒരുക്കിയിട്ടുണ്ട്.

 പാണാട്ട് ചിറ ബോട്ടിംഗ്, ജലകേളി തുടങ്ങിയ സാദ്ധ്യതകളും പരമാവധി പ്രയോജനപ്പെടുത്തും

പാർക്കിന്റെ നിർമ്മാണം അവസാന ഘട്ടത്തിലാണ്. ഈ മാസം തന്നെ ഉദ്ഘാടനം നടത്താനാണ് ശ്രമിക്കുന്നത്

എസ്. അമ്മിണിയമ്മ , പ്രസിഡന്റ് , പൂതക്കുളം ഗ്രാമപഞ്ചായത്ത്