കുളത്തൂപ്പുഴ: നിയന്ത്രണം വിട്ട ഥാർ ജീപ്പ് വീട്ടിലേക്ക് ഇടിച്ചുകയറി, വാഹനം ഓടി​ച്ചി​രുന്ന യുവാവി​ന് ഗുരുതരമായി പരിക്കേറ്റു. ചോഴിയക്കോട് കല്ലുകുഴി സ്വദേശി തൗഫീഖിനാണ് (22) പരിക്കേറ്റത്. ഒപ്പമുണ്ടായിരുന്ന കല്ലുകുഴി സ്വദേശിയായ യുവാവ് പരിക്കേൽക്കാതെ രക്ഷപ്പെട്ടു.

ഇന്നലെ പുലർച്ചെ 6.30 ഓടെ മലയോര ഹൈവേയി​ൽ മടത്തറ- കുളത്തൂപ്പുഴ പാതയിൽ അരിപ്പ പെട്രോൾ പമ്പിന് സമീപത്താണ് സംഭവം. പുലർച്ചെ മുതൽ പുതിയ ഥാർ ജീപ്പ് പ്രദേശത്ത് യുവാക്കൾ ഓടിക്കുന്നുണ്ടായിരുന്നു. ഇതിനിടെ നിയന്ത്രണം തെറ്രിയ വാഹനം ഹൈവേ കലിങ്ക് തകർത്ത്‌ പ്രദേശവാസി​യായ സലിമിന്റെ വീട്ടിലേക്ക് ഇടിച്ചുകയറുകയായിരുന്നു. പോർച്ചിൽ കിടന്ന കാറിലിടിച്ചാണ് ജീപ്പ് നിന്നത്. അപകടസമയം വീട്ടുകാർ വീടി​നുള്ളി​ൽ ആയി​രുന്നതി​നാൽ ദുരന്തം ഒഴിവായി. ‌ഡ്രൈവർ സൈഡിലെ എയർബാഗ് പ്രവർത്തിക്കാതിരുന്നതിനാൽ സ്റ്റിയറിംഗിൽ ഇടിച്ച് മുഖത്താണ് തൗഫീഖി​ന് സാരമായി പരിക്കേറ്റത്. കുളത്തൂപ്പുഴ പൊലീസ് കേസെടുത്തു.