കുന്നത്തൂർ: വാഹനപകടത്തിൽ പരിക്കേറ്റ് ചികിത്സയിലായിരുന്ന സി.പി.എം ശൂരനാട് ഏരിയാ കമ്മിറ്റി ഓഫീസ് സെക്രട്ടറി മരിച്ചു. ശൂരനാട് തെക്ക് പതാരം പുളിക്കമുക്കിന് തെക്ക് മലമേൽ വീട്ടിൽ വിശ്വനാഥ കുറുപ്പിന്റെ മകൻ വി.ദിലീപാണ് (42) മരിച്ചത്. തിരുവോണ ദിവസം പതാരം ശാന്തിനികേതൻ സ്കൂളിന് സമീപം ദിലീപ് സഞ്ചരിച്ചിരുന്ന ബൈക്ക് എതിർദിശയിൽ നിന്നെത്തിയ കാറുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ ദിലിപിനെ ഉടൻ കൊല്ലത്തെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ഇന്നലെ രാവിലെ 11 ഓടെ മരിച്ചു. പതാരം പാസ് സെക്രട്ടറി, ശൂരനാട് ഫാർമേഴ്സ് സർവീസ് സഹകരണ ബാങ്ക് ഡയറക്ടർ ബോർഡ് അംഗം തുടങ്ങിയ നിലകളിൽ പ്രവർത്തിച്ചിരുന്നു. ജില്ലാ ആശുപത്രിയിൽ പോസ്റ്റ്മോർട്ടത്തിന് ശേഷം വൈകിട്ടോടെ എത്തിച്ച മൃതദേഹം സി.പി.എം ശൂരനാട് ഏരിയാ കമ്മിറ്റി ഓഫീസിലും സി.പി.എം ലോക്കൽ കമ്മിറ്റി ഓഫീസിലും പൊതുദർശനത്തിന് വച്ച ശേഷം രാത്രിയോടെ വീട്ടുവളപ്പിൽ സംസ്കരിച്ചു.