പുനലൂർ: ദേശീയപാതയും മലയോര ഹൈവേയും സംഗമിക്കുന്ന പുനലൂർ കെ.എസ്.ആർ.ടി.സി ജംഗ്ഷൻ അപകടങ്ങളുടെയും ഗതാഗതക്കുരുക്കിന്റെയും കേന്ദ്രമായി മാറുന്നു. റോഡ് നവീകരണം കഴിഞ്ഞ് വർഷങ്ങൾ പിന്നിട്ടിട്ടും ഗതാഗതം സുഗമമാക്കാൻ അധികാരികൾ നടപടിയെടുക്കാത്തതാണ് ഈ ദുരിതത്തിന് കാരണം. ജംഗ്ഷനിൽ ഒരു ട്രാഫിക് ഐലന്റ് സ്ഥാപിക്കണമെന്ന ആവശ്യം ശക്തമാവുകയാണ്.

അപാകതകൾ അപകടങ്ങൾ

കൊല്ലം തിരുമംഗലം ദേശീയ പാത കടന്നു പോകുന്ന ഈ ജംഗ്ഷനിൽ നിന്നാണ് മലയോര ഹൈവേ ആരംഭിക്കുന്നത്. കൂടാതെ കെ.എസ്.ആർ.ടി.സി ഡിപ്പോയോട് ചേർന്നുള്ള റോഡും ഇവിടെ സംഗമിക്കുന്നു. റോഡുകളുടെ അശാസ്ത്രീയമായ നിർമ്മിതിയും ഡിപ്പോ ഭാഗത്തെ റോഡിന്റെ ഇറക്കവും അപകടങ്ങൾക്ക് പ്രധാന കാരണങ്ങളാണ്. ദേശീയ പാതയിലേക്ക് വളഞ്ഞ് കയറുമ്പോൾ എതിരേ അഞ്ചൽ റോഡിലേക്ക് എത്തുന്ന വാഹനങ്ങൾ കൂട്ടിയിടിക്കാൻ സാദ്ധ്യതയുണ്ട്. കൂടാതെ, റോഡിനോട് ചേർന്ന് സ്ഥാപിച്ചിട്ടുള്ള കെ.എസ്.ഇ.ബി പോസ്റ്റുകൾ റോഡിന്റെ അലൈൻമെന്റിനെ തടസപ്പെടുത്തുന്നു. വാഹനങ്ങൾ പല ദിശകളിൽ നിന്ന് ഒരേസമയം ജംഗ്ഷനിലേക്ക് പ്രവേശിക്കുന്നതിനാൽ ഇവിടെ ഗതാഗതക്കുരുക്ക് പതിവാണ്. വാഹനങ്ങളുടെ തിരക്കിനിടയിൽ കാൽനടയാത്രക്കാർക്ക് റോഡ് മുറിച്ചുകടക്കാൻ ഏറെ ബുദ്ധിമുട്ടാണ്. ജീവൻ പണയം വെച്ചാണ് ഓരോ കാൽനടയാത്രക്കാരനും ഈ റോഡ് കടക്കുന്നത്.

പ്രധാന ആവശ്യങ്ങൾ

• ട്രാഫിക് ഐലന്റ് സ്ഥാപിക്കുക: നാല് റോഡുകൾ സംഗമിക്കുന്ന ഈ ജംഗ്ഷനിൽ ഒരു ട്രാഫിക് റൗണ്ട് എബൗട്ട് സ്ഥാപിക്കുക. ഇത് ഗതാഗതം ക്രമീകരിക്കാനും അപകടങ്ങൾ കുറയ്ക്കാനും സഹായിക്കും.

• നഗര സൗന്ദര്യവത്കരണം: ട്രാഫിക് ഐലന്റിൽ പൂന്തോട്ടവും അലങ്കാര വിളക്കുകളും തണൽ മരങ്ങളും ഒരുക്കി തൂക്കുപാലത്തിന് അനുസൃതമായി നഗരത്തിന് സൗന്ദര്യം നൽകാം.

• നടപ്പാതയും മേൽപ്പാലവും: ട്രാഫിക് ഐലന്റിനോട് ചേർന്ന് കാൽനടയാത്രക്കാർക്ക് നടപ്പാത ഒരുക്കണം. കൂടാതെ വർഷങ്ങൾക്ക് മുൻപ് പ്രഖ്യാപിച്ചിരുന്ന കാൽനടയാത്രക്കാർക്കുള്ള മേൽപ്പാലം എത്രയും പെട്ടെന്ന് നിർമ്മിക്കണം.

• അടിസ്ഥാന സൗകര്യങ്ങൾ മെച്ചപ്പെടുത്തുക: വൈദ്യുത പോസ്റ്റുകൾ സുരക്ഷിതമായ സ്ഥലത്തേക്ക് മാറ്റണം. ഡിപ്പോ ഭാഗത്തെ റോഡിന്റെ ഇറക്കം കുറച്ച് സുരക്ഷിതമാക്കണം.