കൊല്ലം: ബാർ ജീവനക്കാർ തമ്മിലുണ്ടായ തർക്കത്തെ തുടർന്ന് വൃദ്ധനെ മർദ്ദിച്ച് കൊലപ്പെടുത്താൻ ശ്രമിച്ച യുവാവ് കൊല്ലം വെസ്റ്റ് പൊലീസിന്റെ പിടിയിലായി. ബാർ ജീവനക്കാരനായ ആശ്രാമം പുളിമൂട്ടിൽ ഹൗസിൽ നിതുനാണ് (37,അനീഷ്) പിടിയിലായത്. കോട്ടയം സ്വദേശിയും ബാറിലെ മറ്റൊരു ജീവനക്കാരനുമായ കെ.വി. മാത്യുവിനെയാണ് (50, സാബു) മർദ്ദിച്ച് കൊലപ്പെടുത്താൻ ശ്രമിച്ചത്. കഴിഞ്ഞ 6നായിരുന്നു സംഭവം. ബാറിൽ വച്ച് ഇവർ തമ്മിൽ വാക്ക് തർക്കം ഉണ്ടാവുകയും നിതുൻ മാത്യുവിനെ മർദ്ദിച്ച് തറയിൽ തള്ളിയിടുകയുമായിരുന്നു. വീഴ്ചയിൽ തലയ്ക്ക് ഗുരുതരമായി പരിക്കേറ്റതിനെ തുടർന്ന് മാത്യുവിനെ തിരുവനന്തപുരം മെഡിക്കൽ കോളേജിൽ പ്രവേശിപ്പിക്കുകയായിരുന്നു. തലച്ചോറിലുണ്ടായ ആന്തരിക രക്തസ്രാവമാണ് പരിക്ക് ഗുരുതരമാകാൻ കാരണമെന്നാണ് ഡോക്ടർമാരുടെ കണ്ടെത്തൽ. തിരുവന്തപുരം മെഡിക്കൽ കോളേജ് പരിസരത്ത് നിന്നാണ് പ്രതിയെ പിടികൂടിയത്. കൊല്ലം വെസ്റ്റ് പൊലീസ് ഇൻസ്‌പെക്ടർ ഫയാസിന്റെ നേതൃത്വത്തിൽ എസ്.ഐ അൻസർഖാൻ, എസ്.സി.പി.ഒമാരായ സുജിത്ത്, ദീപുദാസ് എന്നിവരങ്ങിയ സംഘമാണ് പ്രതിയെ പിടികൂടിയത്.