കൊല്ലം: മാനത്തൊരു ചെറിയ മഴ നിറഞ്ഞാൽ, എസ്.വി ടാക്കീസ്- ഉളിയക്കോവിൽ റോഡിൽ വെള്ളം പൊങ്ങാൻ തുടങ്ങും! വർഷങ്ങളായി തുടരുന്ന ഈ ദുരവസ്ഥയ്ക്ക് പരിഹാരം കാണാൻ യാതൊരു ഇടപെടലും അധികൃതരുടെ ഭാഗത്തു നിന്ന് ഉണ്ടാവുന്നില്ല.

കോതേത്ത് കമ്പനിക്ക് സമീപത്തെ 100 മീറ്റർ ഭാഗത്ത് പൊട്ടിപ്പൊളിഞ്ഞ് കിടക്കുന്ന റോഡാണ് ചെറി​യ മഴയി​ൽപ്പോലും തോടായി മാറുന്നത്. നിരവധി കുടുംബങ്ങൾ റോ‌ഡിന്റെ ഇരുവശത്തുമുണ്ട്. വെള്ളം ഒഴുകിപ്പോകാനായി ഈ ഭാഗത്ത് ഓട ഇല്ലാത്തതാണ് സ്ഥിതി രൂക്ഷമാക്കുന്നത്. നി​രവധി​ വാഹനങ്ങൾ ഈ കുഴി​ താണ്ടി​യാണ് പ്രതി​ദി​നം കടന്നു പോകുന്നത്. റോഡിന് വീതി കുറവും ഇരുവശവും മതിലും ആയതിനാൽ കാൽനട യാത്രി​കർക്ക് പലപ്പോഴും ഒഴിഞ്ഞുമാറാൻ കഴിയി​ല്ല. വാഹനങ്ങൾ തെറിപ്പിക്കുന്ന ചെളിവെള്ളത്തിൽ കുളിച്ച് വേണം കാൽനട യാത്രക്കാർ സഞ്ചരി​ക്കാൻ.

കഴിഞ്ഞ ദിവസം പെയ്ത മഴയിലും റോഡ് മൊത്തം വെള്ളക്കെട്ടായി​. മാനം തെളിഞ്ഞാലും ദിവസങ്ങൾ വേണം വെള്ളമി​റങ്ങാൻ. തുടർച്ചയായി മഴ പെയ്താൽ ഇവിടെയുള്ളവർക്ക് പുറത്തിറങ്ങാൻ കഴിയാത്ത സ്ഥിതിയാണ്. ഓരോ മഴക്കാലത്തും തങ്ങളുടെ ദുരിതം ആവർത്തി​ക്കുമെന്നി​രി​ക്കെ, അധി​കൃതർ അനങ്ങാതെ നി​ൽക്കുന്നതി​ൽ ആശങ്കയി​ലാണ് പ്രദേശവാസി​കൾ.

വല്ലാത്ത ദുരവസ്ഥ

വെള്ളം കെട്ടിക്കിടക്കുന്ന റോഡിലൂടെ കാൽനട യാത്ര പോലും വല്ലാത്ത ബുദ്ധി​മുട്ടി​ലായി​രി​ക്കുകയാണ്. നിറുത്താതെ മഴ പെയ്താൽ മുട്ടൊപ്പം വെള്ളത്തിലാണ് പിന്നീട് യാത്ര. അഴുക്ക് വെള്ളത്തിൽ ചവിട്ടാതെ നടക്കാൻ നാട്ടുകാർ റോഡരി​കിൽ സിമന്റ് കട്ട നിരത്തിയിരിക്കുകയാണ്. റോ‌ഡിൽ പലഭാഗത്തും ടാറിളകി ആഴമുള്ള കുഴി രൂപപ്പെട്ടിരിക്കുന്നതിനാൽ ഇരുചക്രവാഹനങ്ങൾ ഇവിടെ അപകടത്തിൽപ്പെടുന്നതും പതിവാണ്.

റോഡിന്റെ നവീകരണം നടത്തിയിട്ട് അധികമായിട്ടില്ല. വീതി കുറവായതിനാൽ ഈ ഭാഗത്ത് ഓട നിർമ്മിക്കാനും കഴിയില്ല. റോഡിന്റെ ബാക്കി ഭാഗത്ത് നവീകരണ പ്രവർത്തനം തുടങ്ങുമ്പോൾ വെള്ളക്കെട്ടിനും പരിഹാരം കാണാൻ ശ്രമിക്കും

കൃപ വിനോദ്, കൗൺസിലർ, കടപ്പാക്കട ഡിവിഷൻ