കൊല്ലം: കേരളത്തിൽ ഏറ്റവും കൂടുതൽ ജീവകാരുണ്യ പ്രവർത്തനങ്ങൾ നടത്തുന്നത് സ്വർണ വ്യാപാരികളാണെന്നും സൗജന്യമായി ആയിരത്തിലധികം കുട്ടികൾക്കാണ് കാതുകുത്തി കമ്മലിടൽ ചടങ്ങ് നടത്തിയതെന്നും ഓൾ കേരള ഗോൾഡ് ആൻഡ് സിൽവർ മർച്ചന്റ്‌സ് അസോസിയേഷൻ സംസ്ഥാന ജനറൽ സെക്രട്ടറി അഡ്വ. എസ്.അബ്ദുൽ നാസർ പറഞ്ഞു. വിശ്വകർമ്മ ദിനം, ആർട്ടിസാൻസ് ദിനം, പ്രധാനമന്ത്രി നരേന്ദ്രമോദിയുടെ 75-ാമത് ജന്മദിനം എന്നിവയോടനുബന്ധിച്ച് അസോസിയേഷൻ സംഘടിപ്പിച്ച പരിപാടി കൊല്ലം പ്രസ് ക്ളബിൽ ഉദ്ഘാടനം ചെയ്യുകയായിരുന്നു അദ്ദേഹം.

50 ലക്ഷം രൂപയുടെ ജീവകാരുണ്യ പ്രവർത്തനമാണ് ഈ ദിവസം നടത്തിയത്. കേരളത്തിലെ സ്വർണ വ്യാപാരികൾ സൗജന്യമായിട്ടാണ് കമ്മലുകൾ നൽകിയത്. മൂന്നാം തവണയാണ് സൗജന്യമായി കാതുകുത്തി കമ്മൽ ചടങ്ങ് നടത്തുന്നത്. സംസ്ഥാന വ്യാപകമായി 5000 സ്വർണ വ്യാപാരികൾ രക്തദാന സമ്മതപത്രം നൽകിയിട്ടുണ്ട്. കൊല്ലം ജില്ലയിൽ നിന്ന് 400 വ്യാപാരികളാണ് സമ്മതപത്രം നൽകിയതെന്നും അദ്ദേഹം പറഞ്ഞു. ജില്ലയിലെ 100 സ്വർണ തൊഴിലാളികളെ വിവിധ യൂണിറ്റുകളിൽ നടന്ന ചടങ്ങിൽ ആദരിച്ചു. ജില്ലാ പ്രസിഡന്റ് ബി.പ്രേമാനന്ദ് അദ്ധ്യക്ഷനായി. ജില്ലാ ജനറൽ സെക്രട്ടറി എസ്.പളനി, സംസ്ഥാന വൈസ് പ്രസിഡന്റ് നവാസ് പുത്തൻവീട്, ജില്ലാ ട്രഷറർ എസ്.സാദിഖ്, സംസ്ഥാന കൗൺസിൽ അംഗങ്ങളായ നാസർ പോച്ചയിൽ, ആർ.ശരവണശേഖർ, ഖലീൽ കുരുംബാലിൽ, കണ്ണൻ മഞ്ജു, ജില്ലാ വൈസ് പ്രസിഡന്റ് കൃഷ്ണദാസ് കാഞ്ചനം, ജില്ലാ സെക്രട്ടറിമാരായ ജോസ് പാപ്പച്ചൻ, ഷാജഹാൻ അൽ അമീൻ തുടങ്ങിയവർ സംസാരിച്ചു.