കൊട്ടാരക്കര: എക്സൈസ് സമുച്ചയം നിർമ്മിക്കാൻ ഭൂമി അനുവദിച്ചിട്ട് രണ്ടുവർഷം പിന്നിട്ടിട്ടും കൊട്ടാരക്കരയിലെ എക്സൈസ് ഓഫീസിന്റെ പ്രവർത്തനം ഇപ്പോഴും പഴയൊരു ഓടുമേഞ്ഞ കെട്ടിടത്തിൽ.

റെയിൽവേ സ്റ്റേഷൻ കവലയിൽ വില്ലേജ് ഓഫീസിനോട് ചേർന്ന്, നിലവിൽ ഓടുമേഞ്ഞ ജീർണാവസ്ഥയിലുള്ള കെട്ടിടത്തിലാണ് എക്സൈസ് സർക്കിൾ ഓഫീസ് പ്രവർത്തിക്കുന്നത്. റവന്യൂ വകുപ്പിന്റെ ഉടമസ്ഥതയിലായിരുന്ന ഈ ഭൂമിയാണ് എക്സൈസ് സമുച്ചയം നിർമ്മിക്കാനായി അനുവദിച്ചത്. 32 സെന്റ് ഭൂമി അനുവദിച്ചുകൊണ്ട് 2023ൽ സർക്കാർ ഉത്തരവുമായി. മന്ത്രി കെ.എൻ.ബാലഗോപാൽ മുൻകൈയെടുത്താണ് കെട്ടിടം നിർമ്മിക്കാൻ ഭൂമി അനുവദിപ്പിച്ചത്. എന്നാൽ കെട്ടിട നിർമ്മാണം ഇപ്പോഴും എങ്ങുമെത്തുന്നില്ല.

തടസങ്ങൾ നീളുന്നു

• കൊട്ടാരക്കരയിൽ എക്സൈസ് സമുച്ചയം നിർമ്മിക്കാനായി 2009ൽ 2.9 കോടി രൂപ അനുവദിച്ചിരുന്നു. കൊട്ടാരക്കര കച്ചേരിമുക്കിൽ സിവിൽ സ്റ്റേഷന് എതിർവശത്തായി മുൻപ് എക്സൈസ് ഓഫീസ് പ്രവർത്തിച്ചിരുന്ന സ്ഥലത്തുതന്നെ പുതിയ കെട്ടിടം നിർമ്മിക്കാനായിരുന്നു പദ്ധതി.
• ഇതിനായി പഴയ കെട്ടിടങ്ങൾ പൊളിച്ചുനീക്കി.
• എക്സൈസ് ഓഫീസുകൾ വാടക കെട്ടിടങ്ങളിലേക്ക് മാറ്റുകയും മുഖ്യമന്ത്രിയായിരുന്ന വി.എസ്.അച്യുതാനന്ദൻ ശിലാസ്ഥാപനം നടത്തുകയുമുണ്ടായി.
• ഭൂമിയുടെ അവകാശത്തെച്ചൊല്ലിയുള്ള തർക്കങ്ങളിൽ ഇവിടെ കെട്ടിട നിർമ്മാണം നടന്നില്ല.
• പിന്നീട് തകർന്നുവീഴാറായ കെട്ടിടത്തിൽ എക്സൈസ് ഓഫീസ് ശ്വാസംമുട്ടുമ്പോഴാണ് കെട്ടിടം നിർമ്മിക്കാൻ മറ്റൊരു ഭൂമി അനുവദിച്ചുകിട്ടിയത്.
• 5.30 കോടി രൂപയുടെ കെട്ടിടം നിർമ്മിക്കാനാണ് ആലോചന നടത്തിയത്.
• ചതുപ്പ് നിലമായിരുന്നതിനാൽ മണ്ണ് പരിശോധന നടത്തിമാത്രമേ എസ്റ്റിമേറ്റ് തയ്യാറാക്കാൻ കഴിയുള്ളു.
• ഇതിനും എസ്റ്റിമേറ്റ് തയ്യാറാക്കലിനുമായി 4,15,000 രൂപ പൊതുമരാമത്ത് വകുപ്പിന് എക്സൈസ് വകുപ്പ് നൽകേണ്ടതുണ്ട്.
• പൊതുമരാമത്ത് കെട്ടിട വിഭാഗത്തിനാണ് നിർമ്മാണ ചുമതല.

തടയിടുന്നത് ഉദ്യോഗസ്ഥർ തന്നെ

തുക ഉണ്ടായിട്ടും, മുട്ടാത്തർക്കങ്ങളിൽ ഇതിന്റെ നടപടിക്രമങ്ങൾ നീളുകയാണ്. കെട്ടിട നിർമ്മാണത്തിനുള്ള ഫണ്ട് എക്സൈസ് വകുപ്പിൽ നിന്നുതന്നെ ലഭിക്കുമെന്നിരിക്കെ ബന്ധപ്പെട്ട ഉദ്യോഗസ്ഥരുടെ കിടമത്സരമാണ് ഇവിടെ തടസമുണ്ടാക്കുന്നത്.

• അനുവദിച്ച ഭൂമി: 32 സെന്റ്

• ഭൂമി അനുവദിച്ച വർഷം: 2023

• പഴയ പദ്ധതിക്ക് അനുവദിച്ച തുക (2009-ൽ): ₹2.9 കോടി

• പുതിയ കെട്ടിടത്തിന് പ്രതീക്ഷിക്കുന്ന നിർമ്മാണച്ചെലവ്: ₹5.30 കോടി

• എസ്റ്റിമേറ്റ് തയ്യാറാക്കാൻ വേണ്ട തുക: ₹4,15,000