വ്യാപാരി ഹർത്താൽ പൂർണം

ചാത്തന്നൂർ: തിരുമുക്കിലെ അശാസ്ത്രീയ അടിപ്പാത വലിയ വാഹനങ്ങൾക്ക് കടന്നുപോകാൻ കഴിയുന്ന തരത്തിൽ പുനർ നിർമിക്കണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതി നേതൃത്വത്തിൽ സംഘടിപ്പിച്ച മനുഷ്യച്ചങ്ങല ജനപങ്കാളിത്തം കൊണ്ട് ശ്രദ്ധേയമായി.

ചാത്തന്നൂർ നെടുങ്ങോലം പരവൂർ മേഖലകളിൽ വ്യാപാരി വ്യവസായി സംഘടനകൾ ആഹ്വാനം ചെയ്തിരുന്ന ഹർത്താൽ പൂർണമായിരുന്നു. കടകമ്പോളങ്ങൾ അടച്ച് വ്യാപാരികൾ മനുഷ്യച്ചങ്ങലയിൽ കണ്ണികളായി. വൈകിട്ട് അഞ്ചിന് തിരുമുക്ക് മുതൽ ചാത്തന്നൂർ വരെയാണ് മനുഷ്യച്ചങ്ങല തീർത്തത്. പരവൂർ മുനിസിപ്പൽ മുൻ ചെയർമാൻ കെ.പി. കുറുപ്പ് ആദ്യ കണ്ണിയായി.

ഇത്തിക്കര ബ്ലോക്ക് പഞ്ചായത്ത് പ്രസിഡന്റ് എം.കെ. ശ്രീകുമാർ പ്രതിജ്ഞാവാചകം ചൊല്ലിക്കൊടുത്ത് സർവകക്ഷി യോഗം ഉദ്ഘാടനം ചെയ്തു. ചാത്തന്നൂർ വികസന സമിതി ചെയർമാൻ ജി.രാജശേഖരൻ അദ്ധ്യക്ഷത വഹിച്ചു. പരവൂർ പ്രൊട്ടക്ഷൻ ഫോറം പ്രസിഡന്റ് അഡ്വ.സ ത്‌ജിത്ത് ആമുഖ പ്രഭാഷണം നടത്തി. പരവൂർ മുനിസിപ്പൽ ചെയർപേഴ്സൺ പി.ശ്രീജ, കൊല്ലം ജില്ലാ പഞ്ചായത്ത് വൈസ് പ്രസിഡന്റ് ശ്രീജ ഹരീഷ്, ചാത്തന്നൂർ ഗ്രാമപഞ്ചായത്ത് പ്രസിഡന്റ് എസ്.കെ. ചന്ദ്രകുമാർ, സി.പി.എം ജില്ലാ സെക്രട്ടേറിയറ്റ് അംഗങ്ങളായ ബി.തുളസീധരക്കുറുപ്പ്, കെ.സേതുമാധവൻ, സി.പി.ഐ മണ്ഡലം സെക്രട്ടറി അഡ്വ. ആർ.ദിലീപ് കുമാർ, കെ.പി.സി.സി അംഗം നെടുങ്ങോലം രഘു, സി.പി.എം ചാത്തന്നൂർ ഏരിയ സെക്രട്ടറി പി.വി. സത്യൻ, ബി.ജെ.പി നേതാവ് സന്തോഷ്, കോൺഗ്രസ്സ് മണ്ഡലം കമ്മിറ്റി പ്രസിഡന്റ് ഇക്ബാൽ, സി.പി.എം ചാത്തന്നൂർ ലോക്കൽ കമ്മിറ്റി സെക്രട്ടറി ടി. ദിജു, വ്യാപാരി വ്യവസായി ഏകോപന സമിതി പ്രസിഡന്റ് ശശിധരൻ, പരവൂർ കൂട്ടായ്മയുടെ സന്തോഷ് പാറയിൽ കാവ്, പരവൂർ യുവജന കൂട്ടായ്മയ്ക്ക് വേണ്ടി ഷൈൻ എസ്.കുറുപ്പ്, സുധീർ ചെല്ലപ്പൻ, എൻ സദാനന്ദൻ പിള്ള, എൻ.രവീന്ദ്രൻ, വി. സണ്ണി ,പി.കെ. മുരളീധരൻ തുടങ്ങിയവർ സംസാരിച്ചു.

പരവൂർ ഉണ്ണി കവിതാലാപനം നടത്തി. കെ.കെ.നിസാർ സ്വാഗതവും ചാത്തന്നൂർ വികസന സമിതി കൺവീനർ ജി.പി.രാജേഷ് നന്ദിയും പറഞ്ഞു.

തിരുമുക്കിൽ ആരംഭിക്കുന്ന റിലേ സത്യാഗ്രഹത്തിന്റെ ആദ്യ ദിവസമായ ഇന്ന് സമരസമിതി ജനറൽ കൺവീനർ കെ.കെ.നിസാറും തുടർന്ന് സതീഷ് വാവറ, ഷിബിനാഥ് , ഷൈൻ എസ്.കുറുപ്പ് തുടങ്ങിയവരും സത്യാഗ്രഹികളാകും. ഇന്ന്. രാവിലെ 10 ന് ബി.ജെ.പി തിരുവനന്തപുരം മേഖല പ്രസിഡന്റ് ബി.ബി. ഗോപകുമാർ റിലേ സത്യാഗ്രഹ സമരം ഉദ്ഘാടനം ചെയ്യും.