കൊല്ലം: കർഷകർക്കായുള്ള പി.എം കിസാൻ സമ്മാൻ നിധി ആനുകൂല്യത്തിന്​ വടക്കേവിള വില്ലേജിലെ വലിയൊരു വിഭാഗം കർഷകർ നൽകി​യ അപേക്ഷകൾ പോർട്ടലിൽ കുടുങ്ങിക്കിടക്കുന്നു. 2021 പകുതി മുതൽ 2023 അവസാനം വരെ നൽകിയ അപേക്ഷകളാണ് കുടുങ്ങിയത്. ഈ കാലയളവിലെ അപേക്ഷളൊന്നും പി.എം കിസാൻ പോർട്ടലിൽ വടക്കേവിള കൃഷിഭവന്റെ ലോഗിനിൽ പരിശോധനയ്ക്കായി ലഭിക്കുന്നില്ല.

ആധാർ നമ്പർ ഉപയോഗിച്ച് രജിസ്റ്റർ ചെയ്താണ് പി.എം കിസാൻ ആനുകൂല്യത്തിന് അപേക്ഷിക്കുന്നത്. ഒരു തവണ അപേക്ഷിച്ചവർക്ക് പി​ന്നീട് അവസരമുണ്ടാവി​ല്ല. തങ്ങളുടെ അപേക്ഷകൾ പോർട്ടലിലെ തകരാറിൽ കുടുങ്ങിയത് ചൂണ്ടിക്കാട്ടി വടക്കേവിള വില്ലേജിലുള്ളവർ കൃഷി വകുപ്പിലെ ഉയർന്ന ഉദ്യോഗസ്ഥർക്കടക്കം പരാതി നൽകിയിട്ടും ഇതുവരെ പരിഹാരമുണ്ടായിട്ടില്ല. ഇവർ ഇടയ്ക്കിടെ വില്ലേജ് ഓഫീസിലെത്തി നിരാശരായി മടങ്ങുന്നു. 2021 ജൂണി​ന് മുൻപും 2023ന് ശേഷവും നൽകിയ അപേക്ഷകൾവടക്കേവിള കൃഷി ഭവൻ ലോഗിനിൽ ലഭ്യമായി പരിശോധിച്ചിട്ടുണ്ട്.

പോർട്ടലിൽ ഓൺലൈനായി രേഖകൾ അപ്‌ലോഡ് ചെയ്യണം. തുടർന്ന് ഈ രേഖകൾ ബന്ധപ്പെട്ട വില്ലേജ് ഓഫീസിൽ സമർപ്പിക്കണം. കൃഷി ഭവൻ ഉദ്യോഗസ്ഥർ രേഖകൾ പരിശോധിച്ച ശേഷം ഡെപ്യൂട്ടി ഡയറക്ടർ ഓഫീസിന് ശുപാർശ ചെയ്യും. അതിന് ശേഷം കൃഷി വകുപ്പ് ഡയറക്ടറേറ്റിലെ പരിശോധന കഴി​ഞ്ഞ് പി.എം കിസാൻ കേന്ദ്ര സെല്ലാണ് അപേക്ഷകൾ അംഗീകരിക്കുന്നത്.

പി.എം കിസാൻ സമ്മാൻ നിധി

 രണ്ടേക്കറിലധികം കൃഷി ഭൂമിയില്ലാത്ത കർഷകർക്ക് പ്രതിവർഷം 6000 രൂപ

 കർഷകരുടെ ബാങ്ക് അക്കൗണ്ടിൽ പണമെത്തും

 ഭൂമിയുടെ കരമടച്ച രസീത്, ഭൂവുടമയുടെ ആധാർ, ബാങ്ക് രേഖ എന്നിവ സഹിതം അപേക്ഷിക്കണം