കൊല്ലം: ജില്ലാ ശിശുക്ഷേമ സമിതിയുടെ സ്വപ്ന പദ്ധതിയായ ചൈൽഡ് ഹബ് യഥാർത്ഥ്യമാക്കാൻ സംസ്ഥാന സർക്കാർ പിന്തുണ നൽകുമെന്ന് മന്ത്രി കെ.എൻ.ബാലഗോപാൽ. കേരളത്തിലെ ആദ്യ കുട്ടികളുടെ മ്യൂസിയം കൊല്ലത്ത് തുടങ്ങുന്നതിന് കൊല്ലം പട്ടണത്തിൽ ഭൂമി കണ്ടെത്തുന്നതിന് ജില്ലാ കളക്ടറെയും ജില്ലാ ശിശുക്ഷേമ സമിതിയെയും ചുമതലപ്പെടുത്തി. കൊല്ലം പട്ടണത്തിൽ തന്നെ തുടങ്ങണമെന്നും മന്ത്രി നിർദേശിച്ചു.
എ ഐ സംവിധാനങ്ങൾ ഉള്ള കുട്ടികളുടെ ഡിജിറ്റൽ പാർക്ക്, മിൽക്ക് ബാങ്ക്, ഡി അഡിഷിൻ സെന്റർ, കൗൺസിലിംഗ് സെന്റർ, ശിശു ക്ഷേമ സമിതിയുടെ പരിചരണ കേന്ദ്രം, ദത്തെടുക്കൽ കേന്ദ്രം, അമ്മത്തൊട്ടിൽ, മാത്യ-ശിശു പരിചരണ കേന്ദ്രം, കുട്ടികളുടെ താമസ സൗകര്യം, അമ്മയും - കുഞ്ഞും പദ്ധതി, ആർട്ട് ഗ്യാലറി, കളി സ്ഥലം, വാക്സിനേഷൻ സെന്റർ, പ്ലേ സ്കൂൾ, ഡിജിറ്റൽ വാൾ, ഭിന്നശേഷി കുട്ടികളുടെ പുനരധിവാസം, ഓട്ടിസം സെന്റർ, വിവിധ തരത്തിലുള്ള തെറാപ്പി യൂണിറ്റുകൾ, കലാ-കായിക രംഗത്തെ പരിശീലനം, കുട്ടികളുടെ ഡാറ്റാ ബാങ്ക്, മാനസിക ഉല്ലസത്തിനുളള സൗകര്യം, ഇ-റീഡിംഗ് കോർണർ തുടങ്ങി അന്താരാഷ്ട്ര നിലവാരത്തോടെ കൊല്ലത്ത് ചൈൽഡ് ഹബ് തുടങ്ങുമെന്നും റിപ്പോർട്ട് സർക്കാരിന് സമർപ്പിക്കുമെന്നും ജില്ലാ ശിശുക്ഷേമ സമിതി സെക്രട്ടറി അഡ്വ. ഡി.ഷൈൻദേവ് പറഞ്ഞു.
സമിതി വൈസ് പ്രസിഡന്റ് അഡ്വ. ഷീബ ആന്റണി അദ്ധ്യക്ഷയായി. പഠനമിത്രം പദ്ധതിയിൽ ജില്ലയിലെ വിദ്യാർത്ഥികൾ സമാഹരിച്ച പഠനോപകരണങ്ങളുടെ വിതരണോദ്ഘാടനം എം.നൗഷാദ് എം.എൽ.എ നിർവഹിച്ചു. ജില്ലാ കളക്ടർ എൻ.ദേവിദാസ് വിദ്യാർത്ഥികളെ ആദരിച്ചു. സ്കൂൾ പ്രിൻസിപ്പൽ ബ്രൈറ്റ് ജോസഫ്, ഉദ്യോഗസ്ഥർ തുടങ്ങിയവർ പങ്കെടുത്തു.