കൊല്ലം: നഗരത്തിലെ പ്രധാനപ്പെട്ട ബസ് കാത്തിരിപ്പ് കേന്ദ്രമായ ചിന്നക്കട ബസ് ബേ കേന്ദ്രീകരിച്ച് രാപകൽ ഭേദമി​ല്ലാതെ സാമൂഹ്യ വിരുദ്ധരുടെ അഴിഞ്ഞാട്ടം. മദ്യപാന സംഘങ്ങൾ ഇവി​ടെ തമ്പടി​ക്കുകയാണ്. യാത്രക്കാരുടെ സുരക്ഷയ്ക്ക് പൊലീസി​ന്റെ ഭാഗത്തുനി​ന്ന് ഇടപെടൽ ഉണ്ടാകുന്നി​ല്ലെന്നും പരാതി​യുണ്ട്.

എല്ലായ്പോഴും മദ്യപസംഘം കയ്യടക്കിയിരിക്കുകയാണ് ഇരിപ്പിടങ്ങൾ. വസ്ത്ര വ്യാപാര സ്ഥാപനങ്ങളിലെ ജോലി കഴിഞ്ഞ് നൂറ്കണക്കിന് സ്ത്രീകളാണ് ഈ കാത്തരിപ്പ് കേന്ദ്രത്തെ ആശ്രയിക്കുന്നത്. ഇവരുൾപ്പടെ യാത്രക്കാരായി എത്തുന്ന സ്ത്രീകളോട് സംഘം അപമര്യദയായി സംസാരിക്കുന്നതും പെരുമാറുന്നതും പതിവാണ്. കാത്തിരിപ്പ് കേന്ദ്രത്തിന് പുറത്താണ് ആളുകൾ കൂട്ടമായി ബസ് കാത്തു നിൽക്കാറുള്ളത്. കെ.എസ്.ആർ.ടി.സി ബസുകൾ കൂടുതലും ദേശീയപാതയോട് ചേർത്താണ് നിറുത്താറുള്ളത്.അതി​നാൽ കെ.എസ്.ആർ.ടി.സി ബസുകളിൽ യാത്ര ചെയ്യുന്നവർ കാത്തിരിപ്പ് കേന്ദ്രത്തിൽ നിന്ന് മാറി റോഡിൽ പല ഭാഗങ്ങളിലായിട്ടാണ് നിൽക്കാറുള്ളത്. സ്വകാര്യ ബസുകൾ ബസ് ബേയോട് ചേർത്താണ് നിറുത്തുന്നതെങ്കി​ലും ഇതിന്റെ സ്റ്റെപ്പുകളിലാണ് യാത്രക്കാർ നിൽക്കാറുള്ളത്. ഈ സാഹചര്യം മുതലെടുത്താണ് മദ്യപാനികൾ ഇവിടെ വിലസുന്നത്.

പൊലീസ് പട്രോളിംഗ് സംഘങ്ങൾ എത്താറുണ്ടെങ്കിലും കാത്തിരിപ്പ് കേന്ദ്രത്തിനുള്ളിലേക്ക് ശ്രദ്ധ പതിയാത്തതും ഇവി​ടം സാമൂഹ്യവിരുദ്ധരുടെ താവളമാകാൻ കാരണമാകുന്നു. വി​ഷയത്തി​ന് എത്രയും വേഗം പരിഹാരം കാണണമെന്നാണ് യാത്രക്കാരുടെ ആവശ്യം.

ഭയങ്കര ശല്യമാണ്. ഇതിനകത്തേക്ക് കയറി നിൽക്കാൻ പറ്റുന്നി​ല്ല. വല്ലാത്ത ദുർഗന്ധമാണ്. താമസിച്ച് എത്തുമ്പോൾ എത്രയും വേഗം ബസ് കിട്ടിയാൽ മതി എന്ന ചിന്തയിൽ പലരും ഇത് ശ്രദ്ധിക്കാറില്ല. അഥവാ ഗതികെട്ട് അവിടെ ഇരിക്കാൻ ശ്രമി​ക്കുകയോ ശ്രദ്ധിക്കുകയോ ചെയ്താൽ ചീത്തവിളികളും കമന്റുകളും കേൾക്കണം

എസ്.സ്നേഹ, യാത്രക്കാരി