തൃപ്രയാർ: ശ്രീരാമസ്വാമി ക്ഷേത്രത്തിന് മുൻവശം കനോലി കനാലിൽ നടന്ന തൃപ്രയാർ ജലോത്സവത്തിൽ എ ഗ്രേഡിൽ ടി.ബി.സി കൊച്ചിൻ ക്ലബ്ബിന്റെ ഗരുഡൻ ഒന്നാം സ്ഥാനം നേടി. തൊയക്കാവ് ദേശം ബോട്ട് ക്ലബ്ബിന്റെ സെന്റ് സെബാസ്റ്റ്യൻ നമ്പർ 2 വാണ് ബി ഗ്രേഡിൽ ജേതാക്കളായത്. എ. ഗ്രേഡിൽ വടക്കൻ ബ്രദേഴ്‌സിന്റെ പൊഞ്ഞനത്തമ്മ നമ്പർ 1 ഉം, ബി ഗ്രേഡിൽ ജെ.പി.സി ജലസംഘം ബോട്ട് ക്ലബ്ബിന്റെ ഗോതുരുത്ത് എന്നിവർ രണ്ടാം സ്ഥാനവും നേടി.മത്സരത്തിൽ 21 ഇരുട്ടുകുത്തി, ചുരുളൻ വള്ളങ്ങൾ പങ്കെടുത്തു. ജലോത്സവം മന്ത്രി കെ.രാജൻ ഉദ്ഘാടനം ചെയ്തു. ജലഘോഷയാത്ര സി.സി.മുകുന്ദൻ എം.എൽ.എ ഫ്‌ളാഗ് ഓഫ് ചെയ്തു. സംഘാടകസമിതി ചെയർമാൻ പി.എം.അഹമ്മദ് അദ്ധ്യക്ഷനായി. ഏറ്റവും നല്ല ചെമ്മീൻ കർഷകനായി തിരഞ്ഞെടുക്കപ്പെട്ട ഷൈൻ ടി. ഭാസ്‌കരനെ ചടങ്ങിൽ ആദരിച്ചു. ജില്ലാ പഞ്ചായത്ത് പ്രസിഡന്റ് വി.എസ്. പ്രിൻസ്, അന്തിക്കാട്, തളിക്കുളം ബ്ലോക്ക് പഞ്ചായത്ത് പ്രസിഡന്റുമാരായ കെ.കെ.ശശിധരൻ, കെ.സി.പ്രസാദ്, നാട്ടിക, താന്ന്യം, പഞ്ചായത്ത് പ്രസിഡന്റുമാരായ എം.ആർ.ദിനേശൻ, ശുഭ സുരേഷ്, ഡോ.കെ.കെ. വിഷ്ണുഭാരതീയ സ്വാമി, സംഘാടക സമിതി ജനറൽ കൺവീനർ പ്രേമചന്ദ്രൻ വടക്കേടത്ത്, ബെന്നി തട്ടിൽ, ഷീന പറയങ്ങാട്ടിൽ, എം. കെ ചന്ദ്രൻ, സി.എൽ ജോയ്, ഷൈൻ നെടിയിരിപ്പിൽ എന്നിവർ സംസാരിച്ചു. വിജയികൾക്ക് ഇ.ടി.ടൈസൺ എം.എൽ.എ വിജയികൾക്ക് ട്രോഫികൾ വിതരണം ചെയ്തു.