ഗുരുവായൂർ: നവരാത്രി മഹോത്സവത്തോട് അനുബന്ധിച്ച് മമ്മിയൂർ ദേവസ്വം നൽകി വരുന്ന ചുമർ ചിത്രാചാര്യൻ മമ്മിയൂർ കൃഷ്ണൻകുട്ടി നായർ സ്മാരക പുരസ്‌കാരം കൂത്ത് കൂടിയാട്ടം കലാകാരൻ കലാമണ്ഡലം രാമചാക്യാർക്ക്. 10001 രൂപയും ശിൽപ്പവും പ്രശസ്തി പത്രവും അടങ്ങുന്നതാണ് പുരസ്‌കാരം. മത്തവിലാസം കൂത്ത്, സന്താനഗോപാലം കൂത്ത്, അംഗുലിയാങ്കം കൂത്ത്, ചാക്യാർ കൂത്ത്, കൂടിയാട്ടം എന്നിവയിൽ വ്യക്തിമുദ്ര പതിപ്പിച്ച വ്യക്തിയാണ് രാമചാക്യാർ. ആർ. പരമേശ്വരൻ, വി.പി.ഉണ്ണിക്കൃഷ്ണൻ, വി.പി.ആനന്ദൻ എന്നിവരടങ്ങിയ പുരസ്‌കാര നിർണയ കമ്മിറ്റിയാണ് പുരസ്‌കാര ജേതാവിനെ തെരഞ്ഞെടുത്തത്. 21ന് നവരാത്രി ആഘോഷത്തിന്റെ ഉദ്ഘാടന വേദിയിൽ വച്ച് പുരസ്‌കാരം നൽകുമെന്ന് ദേവസ്വം ചെയർമാൻ ജി.കെ.പ്രകാശൻ, എക്‌സിക്യൂട്ടീവ് ഓഫീസർ എൻ.ഷാജി എന്നിവർ അറിയിച്ചു.