കൊടുങ്ങല്ലൂർ: ഡോഗ് ഷെൽട്ടറുകൾ ആരംഭിക്കാൻ കൊടുങ്ങല്ലൂർ നഗരസഭ. തെരുവുനായ്ക്കളുടെ പ്രശ്‌നം പരിഹരിക്കാൻ ഷെൽട്ടറിനായി സ്ഥലം കണ്ടെത്താൻ കൗൺസിൽ യോഗം തീരുമാനിച്ചു. അലഞ്ഞു നടക്കുന്ന തെരുവുനായ്ക്കൾക്ക് സുരക്ഷിതമായി ഭക്ഷണവും മരുന്നും നൽകി പാർപ്പിക്കുന്നതിന് അനുയോജ്യമായ സ്ഥലം കണ്ടെത്തും. ഇതിന് നഗരസഭയുടെ കീഴിൽ സ്ഥലം ലഭ്യമല്ലാത്തതിനാൽ വാടകയ്ക്ക് എടുക്കുകയോ സ്ഥലം പണം നൽകി ഏറ്റെടുക്കുകയോ ചെയ്യും. പേ വിഷബാധയ്‌ക്കെതിരായ കുത്തിവെപ്പുകൾ തുടർന്നും നൽകും. നായ്ക്കളുടെ വംശവർദ്ധനവ് തടയുന്നതിനുള്ള എബിസി പദ്ധതിയും നഗരസഭ നടപ്പിലാക്കുന്നുണ്ട്. മഴ മൂലം നഗരസഭയിലെ കേടുവന്ന റോഡുകളിൽ അറ്റകുറ്റപ്പണികൾ അടിയന്തരമായി ചെയ്യുന്നതിന് അസിസ്റ്റന്റ് എൻജിനീയറെ കൗൺസിൽ യോഗം ചുമതലപ്പെടുത്തി. കോട്ടപ്പുറത്ത് നിർമ്മിച്ചിട്ടുള്ള അത്‌ലറ്റിക്ക് കോംപ്ലക്‌സ് തുറക്കും. പുല്ലൂറ്റ് വില്ലേജിൽ പട്ടികജാതി വിദ്യാർത്ഥികൾക്ക് താമസിച്ചു പഠിക്കുന്നതിന് നിർമ്മിച്ച പ്രീമെട്രിക് ഹോസ്റ്റൽ വിദ്യാർത്ഥികളെ ലഭ്യമാകാത്ത സാഹചര്യത്തിൽ മറ്റ് സ്ഥലങ്ങളിൽ നിന്ന് സ്ഥലം മാറിവരുന്ന പട്ടികജാതി വിഭാഗത്തിൽപ്പെട്ട ഉദ്യോഗസ്ഥർക്കും മറ്റും താമസിക്കുന്നതിന് അനുവാദം ലഭിക്കുന്നതിന് പട്ടികജാതി വകുപ്പ് ഡയറക്ടറോട് ആവശ്യപ്പെടും. കെ.എസ്.കൈസാബ്, കെ.ആർ.ജൈത്രൻ, എൽസി പോൾ, വി.എം.ജോണി, പി.എൻ.വിനയചന്ദ്രൻ, രവീന്ദ്രൻ നടുമുറി എന്നിവർ ചർച്ചയിൽ പങ്കെടുത്തു. ചെയർപേഴ്‌സൺ ടി.കെ.ഗീത അദ്ധ്യക്ഷത വഹിച്ചു.