തിരുവനന്തപുരം: കേന്ദ്രമന്ത്രി സുരേഷ് ഗോപിയുടെ ഓണം ഇത്തവണയും ട്രാൻസ്‌ജെൻഡേഴ്സിനോടൊപ്പം. അവിട്ടം ദിനത്തിൽ തിരുവനന്തപുരം ശ്രീമൂലം ക്ലബിൽ പ്രതീക്ഷ ഫൗണ്ടേഷന്റെ ആഭിമുഖ്യത്തിൽ നടക്കുന്ന ഓണാഘോഷ പരിപാടിയിൽ സുരേഷ് ഗോപി പങ്കെടുക്കും. രാവിലെ 10ന് ദീപം തെളിച്ച് പരിപാടികളാരംഭിക്കും. വിവിധ മേഖലകളിൽ കഴിവുതെളിയിച്ച ട്രാൻസ്‌ജെൻഡേഴ്സിനെ ചടങ്ങിൽ ആദരിക്കും. തുടർന്ന് ഓണക്കോടി വിതരണവും ഓണസദ്യയും നടക്കും. മുൻപ് കൊച്ചിയിലും തൃശൂരിലും നടന്ന പരിപാടിയിലും സുരേഷ് ഗോപി പങ്കെടുത്തിരുന്നു. എന്നും കേരളത്തിലെ ട്രാൻസ്‌ജെൻഡേഴ്സ് സമൂഹത്തിന്റെ ദുഃഖത്തിലും ദുരിതത്തിലും ചേർത്തു നിറുത്തുന്ന സുരേഷ് ഗോപി ലിംഗമാറ്റ ശസ്ത്രക്രിയയ്ക്കായി അമൃത ആശുപത്രിയിൽ 12 ലക്ഷം രൂപ നിക്ഷേപിച്ചിരുന്നു. ഇതിൽ പത്തുപേരുടെ ശസ്ത്രക്രിയ വിജയകരമായി പൂർത്തിയാക്കി. ട്രാൻസ്‌ജെൻഡർ സമൂഹത്തിനായി ഭാരതത്തിൽ ഒരു വ്യക്തി ചെയ്യുന്ന ഏറ്റവും വലിയ ജീവകാരുണ്യ പ്രവർത്തനമാണിതെന്ന് പ്രതീക്ഷ ഫൗണ്ടേഷൻ ചെയർമാൻ കെ.ബി.ഉത്തംകുമാർ പറഞ്ഞു.