വിതുര: പൊൻമുടി തിരുവനന്തപുരം സംസ്ഥാനപാതയിൽ തൊളിക്കോട് പഞ്ചായത്തിലെ പതിനെട്ടാംകല്ല് ജംഗ്ഷനിൽ നിന്ന് പാറമുകൾ അപ്പച്ചിപ്പാറ മേഖലയിലേക്കുള്ള റോഡ് തകർന്ന് തരിപ്പണമായി. റോഡ് ശോചനീയാവസ്ഥയിലായിട്ട് നാളേറെയായി. സ്കൂൾ വാഹനങ്ങളടക്കം നൂറുകണക്കിന് വാഹനങ്ങൾ കടന്നുപോകുന്ന റോഡാണിത്. ഗട്ടറുകൾ നിറഞ്ഞുകിടക്കുന്ന റോഡിലൂടെയുള്ള യാത്ര നിലവിൽ അപകടം നിറഞ്ഞതാണ്. സ്വകാര്യവാഹനങ്ങൾ ഒാട്ടം വിളിച്ചാൽപോലും വരാറില്ല. മാത്രമല്ല, കാൽനടയാത്രയും അസാദ്ധ്യമാണ്. മഴക്കാലത്ത് റോഡ് ഏറെ തകർച്ചയിലാകും. തകർന്ന റോഡൽ അപകടങ്ങളും പതിവാണ്. ബൈക്കപകടങ്ങളിൽ നിരവധി പേർക്ക് പരിക്കേറ്റിട്ടുണ്ട്. റോഡ് ഗതാഗതയോഗ്യമാക്കണമെന്നാവശ്യപ്പെട്ട് അധികൃതർക്ക് പരാതി നൽകി മടുത്തു.

 ഓടയും നിർമ്മിക്കണം

വർഷങ്ങൾക്ക് മുമ്പ് റോഡ് ഗതാഗതയോഗ്യമാക്കാൻ ഫണ്ട് അനുവദിച്ചെങ്കിലും യാഥാർത്ഥ്യമായില്ല. റോഡിന്റെ മിക്കഭാഗത്തും ഒാടകൾ നിർമ്മിച്ചിട്ടില്ല. ഇതാണ് റോഡ് തകരുവാൻ കാരണം. കൂടാതെ റോഡിന് വേണ്ടത്ര വീതിയുമില്ല. റോഡിൽ പുറംപോക്ക് കൈയേറ്റവും വ്യാപകമാണ്. റോഡ് ഗതാഗതയോഗ്യമാക്കുമ്പോൾ വീതികൂട്ടണമെന്ന ആവശ്യവും ഉയർന്നിട്ടുണ്ട്. അതേസമയം റോഡ് ഉടൻ ഗതാഗതയോഗ്യമാക്കുമെന്നാണ് പഞ്ചായത്ത് അധികൃതരുടെ മറുപടി.

 അപകടങ്ങളും

തൊളിക്കോട് പതിനെട്ടാംകല്ല് അപ്പച്ചിപ്പാറ പാറമുകൾ റോഡിൽ അപകടങ്ങൾ തുടരുകയാണ് കഴിഞ്ഞ ദിവസം റോഡിലെ കുഴിയിൽ വീണ് ബൈക്ക് യാത്രക്കാരന് പരിക്കേറ്റു. റിട്ട. ഫോറസ്റ്റ് ഉദ്യോഗസ്ഥൻ ഷാജിപോത്തൻകോടിനാണ് പരിക്കേറ്റത്.

 ഗതാഗത യോഗ്യമാക്കണം

തെളിക്കോട് പഞ്ചായത്തിലെ പതിനെട്ടാംകല്ല് അപ്പച്ചിപ്പാറ റോഡ് ഗതാഗതയോഗ്യമാക്കി അപകടങ്ങൾക്ക് തടയിടണം. അടിയന്തരനടപടികൾ സ്വീകരിച്ചില്ലെങ്കിൽ ശക്തമായ സമരപരിപാടികൾ സംഘടിപ്പിക്കും.

മന്നൂർക്കോണം റസിഡന്റ് അസോസിയേഷൻ ഭാരവാഹികൾ.