ആലപ്പുഴ: പൊതുതിരഞ്ഞെടുപ്പിന് മുന്നോടിയായി തദ്ദേശസ്വയംഭരണ സ്ഥാപനങ്ങളിലെ നിയോജകമണ്ഡലങ്ങളുടെയും വാർഡുകളുടെയും സംവരണക്രമം തീരുമാനിക്കുന്നതിനുള്ള നറുക്കെടുപ്പ് ജില്ലയിൽ 13ന് തുടങ്ങും. സംവരണ നിയോജകമണ്ഡലങ്ങളുടെ നറുക്കെടുപ്പ് നടത്തുന്നതിന് നിശ്ചയിച്ചിട്ടുള്ള ഗ്രാമപഞ്ചായത്തുകൾ ഉൾപ്പെടുന്ന ബ്ലോക്ക് പഞ്ചായത്തുകളിൽ തൈക്കാട്ടുശ്ശേരി, കഞ്ഞിക്കുഴി, പട്ടണക്കാട് എന്നിവിടങ്ങളിലെ നറുക്കെടുപ്പ് 13ന് രാവിലെ 10 നും ചെങ്ങന്നൂർ, അമ്പലപ്പുഴ, ഭരണിക്കാവ്‌ ബ്ലോക്കുകളിലെ നറുക്കെടുപ്പ് 14 ന് രാവിലെ 10 നും ചമ്പക്കുളം, വെളിയനാട്, ഹരിപ്പാട്‌ ബ്ലോക്കുകളിലേത് ഒക്ടോബർ 15ന് രാവിലെ 10 മണിക്കും മുതുകുളം, ആര്യാട്, മാവേലിക്കര ബ്ലോക്കുകളിലേത് ഒക്ടോബർ 16ന് രാവിലെ 10 മണിക്കും കളക്ട്രേറ്റ് കോൺഫറൻസ് ഹാളിൽ നടക്കും. ജില്ലയിലെ കായംകുളം, മാവേലിക്കര, ചെങ്ങന്നൂർ, ആലപ്പുഴ, ചേർത്തല, ഹരിപ്പാട് നഗരസഭകളിലേക്കുള്ള നറുക്കെടുപ്പ് 16ന് രാവിലെ 10 ന് ജില്ലാ പഞ്ചായത്ത് മിനികോൺഫറൻസ് ഹാളിൽ നടക്കും. ജില്ലയിലെ ബ്ളോക്ക് പഞ്ചായത്തുകളിലെ നിയോജകമണ്ഡലങ്ങളുടെ സംവരണം നിശ്ചിയിക്കുന്നതിനുള്ള നറുക്കെടുപ്പ് ഒക്ടോബർ 18ന് രാവിലെ 10നും ജില്ലാപഞ്ചായത്ത് നിയോജകമണ്ഡലങ്ങളുടെ സംവരണം നിശ്ചയിക്കുന്നതിനുള്ള നറുക്കെടുപ്പ് ഒ 21ന് രാവിലെ 10നും കളക്ടറേറ്റ്‌ കോൺഫറൻസ് ഹാളിൽ നടക്കും.
സ്ത്രീ, പട്ടികജാതി സ്ത്രീ, പട്ടികവർഗ സ്ത്രീ, പട്ടികജാതി, പട്ടികവർഗം എന്നീ വിഭാഗങ്ങൾക്ക് സംവരണം ചെയ്തിട്ടുള്ളത്രയും എണ്ണം സ്ഥാനങ്ങൾ ആവർത്തന ക്രമമനുസരിച്ച് ഏത് നിയോജകമണ്ഡലങ്ങൾ, വാർഡുകൾക്കാണ് നൽകേണ്ടതെന്ന് തീരുമാനിക്കുന്നതിനാണ് നറുക്കെടുപ്പ് നടത്തുന്നത്.
ഗ്രാമ, ബ്ളോക്ക്, ജില്ലാപഞ്ചായത്തുകളുടെ സംവരണം നിശ്ചയിക്കുന്നതിന് അതത് ജില്ലകളിലെ ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടറെയും, മുനിസിപ്പൽ കൗൺസിലുകളിലേതിന് അതത് തദ്ദേശസ്വയംഭരണ വകുപ്പ് ജില്ലാജോയിന്റ് ഡയറക്ടർമാരെയും, മുനിസിപ്പൽ കോർപ്പറേഷനുകളിലേതിന് തദ്ദേശസ്വയംഭരണവകുപ്പ് അർബൻ ഡയറക്ടറെയുമാണ് അധികാരപ്പെടുത്തിയിട്ടുള്ളത്.