ആലപ്പുഴ: കിടങ്ങാംപറമ്പ്- ബോട്ട് ജെട്ടി ഗോവണിപ്പാലം ഇടറോഡ് പൊട്ടിപ്പൊളിഞ്ഞതോടെ യാത്രക്കാർ ദുരിതത്തിൽ. നവീകരണത്തിന്റെ ഭാഗമായി ജില്ലാ കോടതിപ്പാലം പൊളിക്കുന്നതിനു മുമ്പേ ഈ റോഡ് പുനർനിർമ്മിക്കണമെന്ന് നാട്ടുകാർ ആവശ്യപ്പെട്ടിരുന്നെങ്കിലും അറ്റകുറ്റപ്പണിക്ക് പോലും നടപടിയുണ്ടാകാതിരുന്നതാണ് ഇപ്പോഴത്തെ ദുരിതത്തിന് കാരണം. കോടതിപ്പാലം പൊളിച്ചതോടെ യാത്രക്കാർ പ്രധാനമായും ആശ്രയിക്കുന്ന ഒന്നു കൂടിയാണ് ഈ റോഡ്.
റോഡ് ശാസ്ത്രീയമായി നിർമ്മിച്ച് ടാർ ചെയ്യണമെന്ന് തത്തംപള്ളി റെസിഡന്റ്‌സ് അസോസിയേഷൻ ആവശ്യപ്പെട്ടു. റോഡിൽ നിന്ന് ഒഴുകിയെത്തുന്ന വെള്ളം വാടക്കനാൽ വടക്കേ റോഡിന് കുറുകെ അടിയിലൂടെ പൈപ്പ് വഴി കനാലിലേക്ക് ഒഴുക്കണമെന്നും അസോസിയേഷൻ ഭാരവാഹികൾ പറഞ്ഞു.
ഇരുചക്രവാഹനയാത്ര ദുരിതം
ഇടുങ്ങിയ റോഡായതിനാൽ വശങ്ങളിലുള്ള താഴ്ചയിലേക്ക് ഇരുചക്രവാഹനങ്ങൾ മറിയുന്നത് പതിവാണ്
മറിഞ്ഞുവീഴാതിരിക്കാൻ ഇരുചക്ര വാഹനയാത്രക്കാർക്ക് കാലുകുത്താൻ പോലും പറ്റാത്ത സാഹചര്യമാണിപ്പോൾ
കുടിവെള്ള പൈപ്പുകൾ പൊട്ടുന്നതിനാൽ റോഡ് കൂടുതൽ തകരാറിലാവുന്നുമുണ്ട്
റോഡിലെ ഉപയോഗശൂന്യമായ വൈദ്യുതി, ടെലഫോൺ തൂണുകൾ, കേബിളുകൾ എന്നിവ നീക്കം ചെയ്യണം
യാത്രാ ദുരിതം പരിഹരിക്കാൻ നഹരസഭ എത്രയും വേഗം നടപടി സ്വീകരിക്കണം
- പ്രദേശവാസികൾ