ഹരിപ്പാട്: സുബ്രഹ്മണ്യ സ്വാമി ക്ഷേത്രത്തിൽ സ്കന്ദഷഷ്ഠി വിപുലമായി ആഘോഷിച്ചു. ആയിരങ്ങളാണ് വ്രതാനുഷ്ടാന ഭാഗമായി ക്ഷേത്രത്തിലെത്തിയത്. തുലാമാസത്തിലെ അമാവാസിക്ക് ശേഷമുള്ള ആറാംദിവസമാണ് സ്കന്ദ ഷഷ്ഠി ആഘോഷിക്കുന്നത്. ഷഷ്ഠി വ്രതം അനുഷ്ഠിക്കുന്നതുവഴി കുടുബ ശ്രേയസ്സ്,സന്താനസൗഭാഗ്യം, ദീർഘമംഗല്യം, പാപശാന്തി, എന്നിവ കൈവരുമെന്നാണ് വിശ്വാസം. ഭക്തജനങ്ങളുടെ തിരക്ക് കണക്കിലെടുത്ത് വിപുലമായ ക്രമീകരണങ്ങൾ ക്ഷേത്രത്തിൽ ഒരുക്കിയിരുന്നു. ദേവനെ അഭിഷേകം ചെയ്ത പഞ്ചദ്രവ്യവും തുടർന്ന് വെള്ള നിവേദ്യവും സേവിച്ചാണ് ഭക്തർ ജനങ്ങൾ വ്രതമവസാനിപ്പിച്ചത്.