മണ്ണഞ്ചേരി (ആലപ്പുഴ) : വേമ്പനാട്ട് കായലിൽ കാറ്റിലും കോളിലും പെട്ട് വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. മണ്ണഞ്ചേരി പഞ്ചായത്ത് പത്താംവാർഡിൽ കൈതവളപ്പിൽ വീട്ടിൽ സജിമോന്റെ (കൊച്ചുമോൻ, 54) മൃതദേഹമാണ് ചൊവ്വാഴ്ച രാവിലെ 9.30ഓടെ റാണി, ചിത്തിര കായലിനോട് ചേർന്നുള്ള പുത്തനാറിൽ നിന്ന് തിരച്ചിൽസംഘം കണ്ടെത്തിയത്.

തിങ്കളാഴ്ച രാവിലെയാണ് വള്ളം മുങ്ങി സജിമോനെ കാണാതായത്. വുവരമറിഞ്ഞ് നാട്ടുകാരും അഗ്നിരക്ഷാസേനയും നടത്തിയ തിരച്ചിൽ പ്രതികൂല കാലാവസ്ഥ കാരണം വൈകിട്ടോടെ നിർത്തി. ഇന്നലെ രാവിലെ വീണ്ടും തിരച്ചിൽ നടത്തുന്നതിനിടെ പായലിൽ കുടുങ്ങിയ നിലയിലാണ് മൃതദേഹം കണ്ടെത്തിയത്. പരേതനായ സിദ്ധാർഥന്റെയും സരസമ്മയുടെയും മകനാണ്. ഭാര്യ:ആശ. മകൻ: ആദർശ് ( അറവുകാട് ഐ ടി ഐ വിദ്യാർഥി). സംസ്കാരം വീട്ടുവളപ്പിൽ നടന്നു.