പെരുമ്പാവൂർ: എറണാകുളം ജില്ല ക്ഷീരവികസന വകുപ്പ് സംഘടിപ്പിച്ച ക്ഷീര സംഗമത്തിൽ ജില്ലയിലെ ഗ്രാമപഞ്ചായത്തുകളുടെ വിഭാഗത്തിൽ ക്ഷീര മേഖലയിൽ കൂടുതൽ ഫണ്ട് വിനിയോഗിച്ചതിനുള്ള അവാർഡ് വേങ്ങൂർ പഞ്ചായത്തിന് ലഭിച്ചു. തുടർച്ചയായി നാലാം വർഷമാണ് വേങ്ങൂർ പഞ്ചായത്തിന് ഈ അവാർഡ് ലഭിക്കുന്നത്. പോഞ്ഞാശേരി മൂൺ ലൈറ്റ് കൺവെൻഷൻ സെന്ററിൽ നടന്ന ചടങ്ങിൽ മന്ത്രി ജെ. ചിഞ്ചു റാണിയിൽ നിന്ന് പഞ്ചായത്ത് പ്രസിഡന്റ് ശില്പാ സുധീഷ് അവാർഡ് ഏറ്റുവാങ്ങി. സ്റ്റാൻഡിംഗ് കമ്മിറ്റി ചെയർമാന്മാരായ ബിജു പീറ്റർ, ഷീബ ചാക്കപ്പൻ, മെമ്പർമാരായ ആൻസി ജോബി, ടി. ബിജു, ജിനു ബിജു, ഡയറി എക്സ്റ്റൻഷൻ ഓഫീസർ ഉമ്മു ഹബീബ തുടങ്ങിയവർ പങ്കെടുത്തു.