പെരുമ്പാവൂർ: ലഹരി മുക്തിക്ക് സിനിമാപ്രദർശനവുമായി റൂറൽ ജില്ലാ പൊലീസ്. ഓപ്പറേഷൻ പുനർജനിയുടെ ഭാഗമായി അതിഥി തൊഴിലാളികൾക്കായി പെരുമ്പാവൂർ ഇ.വി.എം തിയേറ്ററിൽ ഇന്ന് രാവിലെ 9 ന് ബംഗാളി സിനിമയായ പാവോയുടെ പ്രദർശനം നടത്തും. ജില്ലാ പൊലീസ് മേധാവി എം.ഹേമലത ഉൾപ്പടെയുള്ള പൊലീസ് ഉദ്യോഗസ്ഥർ,​ ജനപ്രതിനിധികൾ തുടങ്ങിയവർ ഇവരോട് ഒപ്പമിരുന്ന് സിനിമ കാണും. തൊഴിലാളികൾക്കിടയിൽ മയക്കുമരുന്നിന്റെ വരവും ഉപയോഗവും തടയുക, ആസക്തി ബാധിച്ചവർക്ക് വൈദ്യശാസ്ത്ര പരവും, മാനസികവും സാമൂഹികവുമായ പിന്തുണ നൽകുക, ബോധവത്കരണം നൽകുക, ബദൽ ജീവിത ശൈലികൾ പ്രോത്സാഹിപ്പിക്കുക, മറ്റ് സംസ്ഥാനങ്ങളിലെ അധികാരികളുമായി സഹകരിച്ച് പരിശോധനകൾ നടത്തുക, സുരക്ഷിതമായ ജീവിതാന്തരീക്ഷം സൃഷ്ടിക്കുക, കായിക വിനോദത്തിന് അവസരങ്ങളൊരുക്കുക തുടങ്ങിയവയാണ് പ്രധാനമായി ലക്ഷ്യമിടുന്നതെന്ന് ഓപ്പറേഷന് നേതൃത്വം നൽകുന്ന ജില്ലാ പോലീസ് മേധാവി എം. ഹേമലത പറഞ്ഞു.