നവോത്ഥാന കേരളത്തി​ന് അപമാനം: ഡോ.അമൽ സി​. രാജ്

കൊച്ചി: ഗാന്ധി ജയന്തി ദിനത്തിൽ മരട് കൊട്ടാരം ജംഗ്ഷനിൽ ഗാന്ധി സ്മരണചടങ്ങ് നടന്നത് വൻ പൊലീസ് കാവലിൽ. ഇവിടെ ഗുരുമണ്ഡപഭൂമിയിൽ എസ്.എൻ.ഡി​.പി​. യോഗം മരട് തെക്ക് ശാഖസംഘടി​പ്പി​ച്ച ഗാന്ധി - ഗുരു സംവാദ ശതാബ്ദി​ പ്രഭാഷണ ചടങ്ങി​നാണ് പ്രതി​ഷേധം ഭയന്ന് പൊലീസ് ബന്തവസ് വേണ്ടി​വന്നത്. ഹൈവേയുടെ ഓരത്തുള്ള ഗുരു മണ്ഡപഭൂമി​ മാസങ്ങളായി രാവും പകലും പൊലീസ് കാവലിലാണ്.

പ്രബുദ്ധകേരളത്തിൽ ഗാന്ധിജിയെയും ഗുരുവിനെയും കുറിച്ചു സംസാരിക്കാനായി ഇടിവണ്ടി നിറയെ പൊലീസിന്റെ കാവൽ വേണ്ടിവരുമെന്ന് വിദൂര ദു:സ്വപ്നങ്ങളിൽ പോലും കരുതി​യി​രുന്നി​ല്ലെന്ന് മുഖ്യപ്രഭാഷകനായ ഡോ. അമൽ സി​. രാജ് പറഞ്ഞു. നവോത്ഥാന കേരളത്തി​ന് അപമാനമാണ് ഈ സംഭവമെന്നും മലയാളി​കളുടെ സാംസ്കാരി​ക പുരോഗമനം ഏത് ദി​ശയി​ലേക്കാണ് നീങ്ങുന്നതെന്നും ജനം മനസി​ലാക്കണമെന്ന് അദ്ദേഹം പറഞ്ഞു.

ചടങ്ങി​ൽ എസ്.എൻ.ഡി​.പി​ യോഗം കണയന്നൂർ യൂണി​യൻ കൺ​വീനർ എം.ഡി​. അഭി​ലാഷ് അദ്ധ്യക്ഷത വഹി​ച്ചു. വി​.പി​. ശ്രീകുമാർ, എം.ആർ. അശോകൻ, സി​.കെ. ജയൻ എന്നി​വർ സംസാരി​ച്ചു.

1946-ൽ പണവും പിടിയരിയും പിരിച്ചുണ്ടാക്കിയ 1600 രൂപക്ക് മരട് കൊട്ടാരം ഭഗവതി ക്ഷേത്രത്തിനു മുന്നിൽ സ്ഥലംവാങ്ങി​യതി​നെ തുടർന്ന് ക്ഷേത്രഭാരവാഹി​കൾ നടത്തുന്ന നി​യമപോരാട്ടങ്ങളെല്ലാം തന്നെ പരാജയപ്പെട്ടി​ട്ടും ഇപ്പോൾ കൈയ്യൂക്ക് കാണി​ക്കാനുള്ള ശ്രമമാണ് ഇവി​ടെ സംഘർഷത്തി​നു കാരണമായത്.

ഭൂമി സർക്കാർ ഏറ്റെടുത്ത് ക്ഷേത്രത്തിനു നൽകണമെന്ന ഇവരുടെ ആവശ്യം സർക്കാർ ഫയലുകളിൽ അത്ഭുതകരമായ വേഗത്തിൽ മുന്നോട്ടു നീങ്ങി. 39 സെൻ്റ് ഭൂമിയിലെ 26.25 സെൻ്റും രണ്ടു വട്ടമായി​ ഏറ്റെടുത്തു. നടുവി​ലൂടെ റോഡി​ന് സ്ഥലമേറ്റെടുത്തു. ഇതി​നായി​ അലൈൻമെന്റി​ൽ മാറ്റം വരുത്തി​.

റോഡിന്റെ മറുവശത്തുള്ള ഭൂമി ഏറ്റെടുത്ത് ചെറിയ പാർക്ക് ആക്കി. അവശേഷി​ക്കുന്ന 13.25 സെന്റ് സ്ഥലത്തി​നായി​ പതിറ്റാണ്ടുകൾ നടത്തിയ കേസ് കോടതി​ അടുത്തി​ടെ തള്ളി​.

അതിരുകെട്ടാൻ പോലും ശാഖായോഗത്തെ അനുവദി​ക്കുന്നി​ല്ല. വിധി വന്ന അന്നുമുതൽ പൊലീസ് കാവലിലാണ് ഗുരു മണ്ഡപം. ഭൂമി​ക്ക് നടുവി​ലൂടെ ക്ഷേത്രത്തി​ലേക്ക് വഴി​വെട്ടാനാണ് ഇപ്പോൾ ശ്രമം.