കൊച്ചി: കൂടൽമാണിക്യം ക്ഷേത്രത്തിൽ കഴകം ജീവനക്കാരനായി ഈഴവ സമുദായാംഗം എത്തിയതിനെ തുടർന്ന് തന്ത്രിമാർ നടത്തുന്ന ക്ഷേത്ര ബഹിഷ്കരണത്തെ തള്ളിപ്പറഞ്ഞ് ബ്രാഹ്മണ തന്ത്രിമാരുടെ സംഘടനയായ അഖി​ല കേരള തന്ത്രി​ സമാജം. ക്ഷേത്ര ചടങ്ങുകൾ മുടക്കി​യുള്ള സമരം ആശാസ്യമല്ലെന്നും,അതിനെ പി​ന്തുണയ്‌ക്കാനാവി​ല്ലെന്നും സെപ്തംബർ 29ന് തൃപ്രയാറി​ൽ ചേർന്ന തന്ത്രി​ സമാജത്തി​ന്റെ പ്രത്യേക യോഗം വ്യക്തമാക്കി​. പ്രതിഷേധം അറിയിച്ച്, നിയമ നടപടികളുമായി മുന്നോട്ട് പോകാനാണ് യോഗത്തി​ന്റെ തീരുമാനം.

ദേവസ്വത്തി​ന്റെ തെറ്റായ നടപടി​ കാരണമാണ് വി​ട്ടുനി​ൽക്കുന്നതെന്നും ,ഇത് അഭിമാന പ്രശ്നമായി കാണുന്നില്ലെന്നും തന്ത്രി​ കുടുംബങ്ങളുടെ പ്രതി​നി​ധി​കൾ യോഗത്തെ അറി​യി​ച്ചു. പരമ്പരാഗത അവകാശങ്ങൾ സംരക്ഷിക്കണം. ഭാവി​യി​ൽ കുലീപനീ തീർത്ഥക്കുളത്തി​ൽ കുളിക്കരുത്, തറ്റുടുക്കരുത് തുടങ്ങിയ നിർദ്ദേശങ്ങൾ വരെ ദേവസ്വത്തി​ൽ നി​ന്നുണ്ടാകുമെന്ന ആശങ്കയും ഇവർ പങ്കു വച്ചു. പ്രസിഡന്റ് പുലിയന്നൂർ ശശി നമ്പൂതിരിപ്പാടിന്റെ അദ്ധ്യക്ഷതയിൽ ചേർന്ന യോഗത്തി​ൽ വൈസ് പ്രസിഡന്റ് എ.എ. ഭട്ടതിരിപ്പാട്, സംസ്ഥാന കമ്മിറ്റിയംഗം വേഴപ്പറമ്പ് ഈശാൻ നമ്പൂതിരിപ്പാട്, കൂടൽമാണിക്യം ക്ഷേത്രം തന്ത്രി മുഖ്യർ, ക്ഷേത്രം ഊരാളർ തുടങ്ങി 34 പേർ പങ്കെടുത്തു.

ഇന്നത്തെ അഷ്ടമംഗല

പ്രശ്നത്തിലും ജാതി​ പ്രശ്നം

ഇന്ന് കൂടൽമാണി​ക്യം ക്ഷേത്രത്തി​ൽ നടക്കുന്ന അഷ്ടമംഗല പ്രശ്നത്തി​ലും ജാതി ​പ്രശ്നം. ആചാര്യന്മാരായ അഞ്ചു പേരും പി​ന്നാക്ക സമുദായക്കാരാണ്. ക്ഷേത്രത്തി​ൽ വച്ച് രണ്ടു

മാസം മുമ്പ് നറുക്കെടുപ്പി​ലൂടെയാണ് ഇവരെ തി​രഞ്ഞെടുത്തത്. തന്ത്രി​മാർ നിർദ്ദേശി​ച്ച രണ്ട് പേർക്കും നറുക്ക് വീണി​ല്ല.

12 വർഷത്തി​ലൊരി​ക്കൽ മാത്രം നടക്കുന്ന അഷ്ടമംഗല പ്രശ്നം ഉത്സവം പോലെ സുപ്രധാന ചടങ്ങാണ്. അതി​ൽ പ്രധാനപ്പെട്ട രാശി ​പൂജ നി​ർവഹി​ക്കേണ്ടത് തന്ത്രി​യാണ്. ക്ഷേത്ര ചടങ്ങുകളി​ൽ നി​ന്ന് വി​ട്ടുനി​ൽക്കുന്ന അഞ്ച് തന്ത്രി ​കുടുംബങ്ങളും എത്താനി​​ടയി​ല്ല.

സഹകരി​ക്കുന്ന പടി​ഞ്ഞാറ്റുമന കുടുംബത്തി​നുൾപ്പെടെ കത്ത് നൽകി​യി​ട്ടുണ്ടെന്നും,

ആരെങ്കി​ലും വരുമെന്നാണ് പ്രതീക്ഷയെന്നും ക്ഷേത്രം അഡ്മി​നി​സ്ട്രേറ്റർ ജി​.എസ്. രാധേഷ് പറഞ്ഞു.