പെരുമ്പാവൂർ : എം.സി. റോഡിൽ പുല്ലുവഴിയിലുള്ള ഡബിൾ പാലത്തിലെ അവസാന ഘട്ട ബി.എം ആൻഡ്ബി. സി ടാറിംഗ് ജോലികൾ പൂർത്തിയായതായി എൽദോസ് കുന്നപ്പിള്ളി എം.എൽ.എ അറിയിച്ചു. എം.സി റോഡിൽ പുല്ലുവഴി ഭാഗത്തുള്ള തായ്ക്കരച്ചിറ പാലം രണ്ട് പ്രത്യേക പാലങ്ങളായാണ് മുമ്പ് പണിതിരുന്നത്. പഴയ പാലം ഉയരം കുറവായതിനാൽ അപകടങ്ങൾ ഇവിടെ നിത്യ സംഭവമായിരുന്നു. ഇതിനെ തുടർന്നാണ് രണ്ടു പാലങ്ങളും ചേർത്ത് ഒറ്റ പാലമാക്കണമെന്ന ആവശ്യം എം.എൽ.എ മുന്നോട്ടുവച്ചത്. 2 കോടി രൂപ അനുവദിച്ച പ്രവൃത്തി 6 മാസം കൊണ്ട് പൂർത്തിയാക്കുവാൻ സാധിച്ചതായി അദ്ദേഹം പറഞ്ഞു. സൂചന ബോർഡുകളും ട്രാഫിക് ലൈനുകളും ആവശ്യമായ റിഫക്ടറുകളും സ്ഥാപിക്കുന്നതോടുകൂടി ദീർഘനാളായിട്ടുള്ള എം.സി റോഡിലെ ഗതാഗതക്കുരുക്കിനും അപകടത്തിനും ശാശ്വത പരിഹാരമാകും.