പെരുമ്പാവൂർ: ജില്ലാ പഞ്ചായത്തിന്റെ നേതൃത്വത്തിൽ കാർഷിക വികസന കർഷക ക്ഷേമ വകുപ്പിന്റെ സഹകരണത്തോടെ ഒക്കൽ സംസ്ഥാന വിത്തുത്പാദന കേന്ദ്രത്തിൽ സംഘടിപ്പിക്കുന്ന ഒക്കൽ ഫാം ഫെസ്റ്റ് ഇന്ന് ആരംഭിക്കും. 14ന് സമാപിക്കും. കാർഷിക പ്രദർശന - വിപണന മേള, സെമിനാറുകൾ, ഡോക്യുമെന്ററി - വീഡിയോ പ്രദർശനം, മഡ് ഫുട്ബാൾ, വനിതകളുടെ പായസ പാചക മത്സരം, ചൂണ്ടയിടൽ മത്സരം, ട്രഷർ ഹണ്ട്, റെയിൻബോ ഡാൻസ്, വിവിധ കലാപരിപാടികൾ തുടങ്ങിയവ ഫാം ഫെസ്റ്റിനോടനുബന്ധിച്ച് സംഘടിപ്പിച്ചിട്ടുണ്ട് ദിവസവും രാവിലെ 9 മുതൽ വൈകിട്ട് 7 വരെയാണ് പരിപാടികൾ. ഫാം ഫെസ്റ്റിന് മുന്നോടിയായി ഇന്നലെ വൈകീട്ട് മഡ് ഫുട്ബാൾ മത്സരം ജില്ലാ കളക്ടർ ജി പ്രിയങ്ക ഉദ്ഘാടനം ചെയ്തു.
ഇന്ന് ഉച്ചക്ക് 2.30ന് കൃഷി മന്ത്രി പി. പ്രസാദ് ഫെസ്റ്റ് ഉദ്ഘാടനം ചെയ്യും എൽദോസ് കുന്നപ്പിള്ളി എം.എൽ.എ അദ്ധ്യക്ഷനാകും. ബെന്നി ബഹനാൻ എം.പി മുഖ്യപ്രഭാഷണം നടത്തും. ഒക്ടോബർ 14ന് വൈകീട്ട് സമാപന സമ്മേളനം മന്ത്രി പി. രാജീവ് ഉദ്ഘാടനം ചെയ്യും. എല്ലാദിവസവും കാർഷിക ക്ലാസുകളും വിവിധ കലാപരിപാടികളും അരങ്ങേറും. സെമിനാറുകൾ, ചലച്ചിത്രപ്രദർശനം, കാർഷിക ക്വിസ് തുടങ്ങിയവ കൂടാതെ പ്രദർശന വില്പന സ്റ്റാളുകൾ മേളയുടെ ഭാഗമായി സജ്ജമാക്കിയിട്ടുണ്ട്. പഴയകാല കാർഷിക ഉപകരണങ്ങളുടെ പ്രദർശനവും സെൽഫി മത്സരവും സംഘടിപ്പിച്ചിട്ടുണ്ട്.
.