പെരുമ്പാവൂർ: മയക്കുമരുന്നിനെതിരെ ജനമനസുകളിൽ പാട്ടുകൾ കൊണ്ട് സ്ഥാനം പിടിക്കാമെന്ന പ്രതീക്ഷയിൽ ഗാനമേളയുമായി എറണാകുളംറൂറൽ ജില്ലാ പൊലീസ്. ഒരാഴ്ച നീണ്ടു നിൽക്കുന്ന "പാടാം ഒരു ഗാനം" എന്ന സംഗീത പരിപാടിക്ക് അത്താണി സിഗ്നൽ ജംഗ്ഷനിൽ തിങ്കളാഴ്ച തുടക്കമാകും.

ആലുവ സബ്ഡിവിഷന്റെ നേതൃത്വത്തിലാണ് പരിപാടി. രജിസ്റ്റർ ചെയ്താൽ ആർക്കും സ്റ്റേജിൽ പാടാം. ട്രാക്ക് ഗാനമേളയാണ് നടക്കുന്നത്. പ്രത്യേക സൗണ്ട് സിസ്റ്റം ഇതിനായി ഒരുക്കിയിട്ടുണ്ട്. ആലുവ സബ്ഡിവിഷനിലെ മുതിർന്ന പൊലീസുദ്യോഗസ്ഥരും റൂറൽ ജില്ലയിലെ പൊലീസുകാരിലെ പാട്ടുകാരും പാടാൻ താൽപ്പര്യമുള്ള പൊതുജനങ്ങളും ഈ പരിപാടിയിൽ പങ്കാളിയാകും. ആദ്യ ദിവസം സ്റ്റാർ സിംഗർ ഗായകൻ ജോബി ജോൺ മുഖ്യതിഥിയാകും.

വൈകിട്ട് 5 മുതൽ രാത്രി 9.30 വരെയാണ് ജനകീയ കരാേക്കെ ഗാനമേള നടക്കുന്നത്. 18 ന് സമാപിക്കും. ജില്ലാ പൊലീസ് മേധാവി എം.ഹേമലതയുടെ നേതൃത്വത്തിൽ റൂറൽ ജില്ലയിൽ നടക്കുന്ന ലഹരി വിരുദ്ധ പരിപാടികളുടെ ഭാഗമായാണ് പാടാം ഒരു ഗാനം സംഘടിപ്പിച്ചിട്ടുള്ളതെന്ന് ആലുവ ഡിവൈ.എസ്.പി ടി.ആർ രാജേഷ് പറഞ്ഞു.