കൊച്ചി: ഇന്ത്യയിലെ ആദ്യ ഹാക്ക്ആർട്ട്തോൺ എ.ഡി.എച്ച്.ഡി കൂട്ടുതാളം 18, 19 തീയതികളിൽ കളമശേരിയിലെ ടിങ്കർസ്‌പേസിൽ നടക്കും. ഫ്‌ളോ ഹെൽത്ത്‌കെയർ, ടിങ്കർസ്‌പേസ് എന്നിവ സംയുക്തമായാണ് പരിപാടി സംഘടിപ്പിക്കുന്നത്.
അറ്റൻഷൻ ഡെഫിസിറ്റ് ഹൈപ്പർ ആക്ടിവിറ്റി ഡിസോർഡർ (എ.ഡി.എച്ച്.ഡി) സമൂഹം നേരിടുന്ന ദൈനംദിന വെല്ലുവിളികളെക്കുറിച്ച് പരിപാടി പൊതുബോധം വളർത്തും. എ.ഡി.എച്ച്.ഡി വ്യക്തികളുടെ ചിന്താരീതിയും പ്രവർത്തനവും അവലോകനംചെയ്ത് പരിഹാരങ്ങൾ തേടും. മേക്കർമാരെയും ആർട്ടിസ്റ്റുകളെയും പരിശീലകരെയും തെറാപ്പിസ്റ്റുകളെയും, എ.ഡി.എച്ച്.ഡി വ്യക്തികളെയും ഒരേവേദിയിൽ സംയോജിപ്പിക്കുന്ന ഇന്ത്യയിലെ ആദ്യത്തെ ഹാക്ക്ആർട്ട്തോൺ എന്ന സവിശേഷതയും പരിപാടിക്കുണ്ട്.
ഹാക്ക്ആർട്ട്‌തോണിലൂടെ എ.ഡി.എച്ച്.ഡി വ്യക്തികൾക്ക് ജീവിതത്തിൽ നേരിടുന്ന വെല്ലുവിളികൾ തിരിച്ചറിയാനും വിദഗ്ദ്ധരുടെയും തെറാപ്പിസ്റ്റുകളുടെയും നിർദ്ദേശത്തോടെ പ്രായോഗികമായ ജീവിതരീതി സ്വായത്തമാക്കാനും സാധിക്കും. ഇൻസ്റ്റലേഷനുൾപ്പെടെ കലാസൃഷ്ടികൾ അവതരിപ്പിച്ച് സൃഷ്ടിപരതയും വൈവിദ്ധ്യവും ആത്മവിശ്വാസവും വർദ്ധിപ്പിക്കും.
ജീവിതം ആയാസരഹിതമാക്കാം
എ.ഡി,എച്ച്.ഡി നേരിടുന്നവരും അല്ലാത്തവരും തൊഴിലിടത്തിലും പുറത്തും സഹകരിക്കേണ്ടത് ഇരുവിഭാഗത്തിനും ബുദ്ധിമുട്ടുകളുണ്ടാക്കുന്നു. ഈ സാഹചര്യത്തിൽ എ.ഡി.എച്ച്.ഡി വ്യക്തികൾക്ക് തങ്ങളുടെ ജീവിതം കൂടുതൽ ആയാസരഹിതമാക്കാൻ ക്രിയേറ്റിവിറ്റിയും സാങ്കേതികവിദ്യയും സംയോജിപ്പിച്ച് സഹാനുഭൂതിയോടെ പരിഹാരങ്ങൾ കണ്ടെത്തുകയാണ് പരിപാടിയുടെ ലക്ഷ്യം.
കൊച്ചിയെ സഹാനുഭൂതി നഗരമാക്കാം
ന്യൂറോഡൈവേഴ്‌സിറ്റി, ആക്‌സസിബിലിറ്റി തുടങ്ങിയ വിഷയങ്ങളിൽ ഹാക്ക് ആർട്ട്തോൺ സംവാദങ്ങൾക്ക് അവസരമൊരുക്കും. സാങ്കേതികവിദ്യയും സൃഷ്ടിപരതയും ഒന്നുചേരുന്ന കൊച്ചിയെ സമൂഹത്തോട് സഹാനുഭൂതി പുലർത്തുന്ന നഗരമെന്ന തലത്തിലേക്ക് ഉയർത്താനും ഇത് സഹായിക്കും. സഹൃദയ വെൽഫെയർ സർവീസസ് എറണാകുളം, ലൈംഗിക വിദ്യാഭ്യാസം നൽകുന്ന എസ്.ഇ.കെ ഫൗണ്ടേഷൻ എന്നിവരുടെയും സഹകരണത്തോടെയാണ് കൂട്ടുതാളം സംഘടിപ്പിക്കുന്നത്.
കുര്യൻ ജേക്കബ്
ചീഫ് ഓപ്പേറേറ്റിംഗ് ഓഫീസർ
ടിങ്കർഹബ് ഫൗണ്ടേഷൻ