നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ (സിയാൽ) എമിറേറ്റ്‌സ് സ്‌കൈ കാർഗോയുടെ ഓപ്പറേഷൻസ് കേന്ദ്രം സിയാൽ മാനേജിംഗ് ഡയറക്ടർ എസ്. സുഹാസ്, എമിറേറ്റ്‌സ് സ്‌കൈ കാർഗോ മാനേജർ അമീർ അൽ സറൂനി എന്നിവർ ചേർന്ന് ഉദ്ഘാടനം ചെയ്തു. എമിറേറ്റ്‌സ് സ്‌കൈ കാർഗോ ഓപ്പറേഷൻസ് ലീഡ് ഹസ്സൻ അബ്ദുള്ള, സിയാൽ കാർഗോ വിഭാഗം മേധാവി സതീഷ് കുമാർ പൈ, കൊമേർഷ്യൽ വിഭാഗം മേധാവി മനോജ് പി. ജോസഫ്, കസ്റ്റംസ് ഡെപ്യൂട്ടി കമ്മിഷണർ ഇ. വികാസ് എന്നിവർ പങ്കെടുത്തു.
കൊച്ചിയിൽ നിന്നുള്ള അന്താരാഷ്ട്ര ചരക്കു നീക്കത്തിന് എമിറേറ്റ്‌സ് ഓഫീസ് പുത്തൻ ഉണർവാകുമെന്നാണ് പ്രതീക്ഷ. മധ്യേഷ്യയിലേക്കും യൂറോപ്പിലേക്കുമുള്ള ചരക്ക് നീക്കം കൂടുതൽ ശക്തിപ്പെടുത്താൻ എമിറേറ്റ്‌സ് സ്‌കൈ കാർഗോയുടെ സാന്നിദ്ധ്യം സഹായിക്കും.
കൊച്ചിയെ കാർഗോ ഹബ്ബായി വികസിപ്പിക്കുന്നതിലെ സുപ്രധാന ചുവടുവെപ്പാണിതെന്ന് സിയാൽ അധികൃതർ പറഞ്ഞു. അന്താരാഷ്ട്ര കൊറിയർ സർവീസുകൾ, കൂടുതൽ ഫ്രെെറ്റ് ഫോർവേഡേഴ്‌സ് എന്നിവ തുടങ്ങാനും ലക്ഷ്യമുണ്ട്. തമിഴ്‌നാട്, കേരളം എന്നിവിടങ്ങളിൽ നിന്നുമുള്ള വസ്ത്ര കയറ്റുമതിയുടെ കേന്ദ്രമായി സിയാലിനെ മാറ്റുന്നത് സംബന്ധിച്ച് സിയാലും എമിറേറ്റ്‌സ് സ്‌കൈ കാർഗോയും ചർച്ചയാരംഭിച്ചിട്ടുണ്ട്. ചരക്ക് - വ്യാപാര സൗകര്യങ്ങൾ വർദ്ധിപ്പിക്കുക, കാർഗോയുടെ അളവ് വർദ്ധിപ്പിക്കുക, മേഖലയിലെ സാമ്പത്തിക വളർച്ചയെ പ്രോത്സാഹിപ്പിക്കുക എന്നിവയാണ് സഹകരണത്തിന്റെ ലക്ഷ്യം.