കൊച്ചി: സാഹിത്യനിരൂപകനും വിമർശകനുമായ ബാലചന്ദ്രൻ വടക്കേടത്തിന്റെ നേതൃത്വത്തിൽ രൂപീകരിച്ച 'വീണ്ടെടുപ്പ്' സാഹിത്യ കൂട്ടായ്മയുടെ പ്രഥമ പുരസ്‌കാരം സാഹിത്യവിമർശകനും കോളമിസ്റ്റുമായ എം.കെ. ഹരികുമാറിന് ലഭിക്കും. വടക്കേടത്ത് യുവ അവാർഡിന് കവി നോമികൃഷ്ണ അർഹയായി.

19ന് ഉച്ചയ്ക്ക് രണ്ടിന് വലപ്പാട് ഏങ്ങൂർ ഭുവനേശ്വരി ക്ഷേത്രം ഹാളിൽ നടക്കുന്ന ചടങ്ങിൽ നോവലിസ്റ്റ് യു.കെ. കുമാരൻ പുരസ്‌കാരം സമർപ്പിക്കും. സാഹിത്യനിരൂപകനും സമസ്ത കേരള സാഹിത്യപരിഷത്ത് സെക്രട്ടറിയുമായ നെടുമുടി ഹരികുമാർ, ഡോ. പി. സരസ്വതി, സംവിധായകൻ അമ്പിളി, ആർട്ടിസ്റ്റ് രവീന്ദ്രൻ വലപ്പാട്, സാഹിത്യനിരൂപകൻ എം.ഡി. ചന്ദ്രമോഹൻ തുടങ്ങിയവർ പങ്കെടുക്കുമെന്ന് ചെയർമാൻ കെ. ദിനേശ് രാജാ, സെക്രട്ടറി ജോസ് താടിക്കാരൻ എന്നിവർ അറിയിച്ചു.