കൊച്ചി: കൊച്ചി ആസ്ഥാനമായി പ്രവർത്തിക്കുന്ന 'ദി ആർട്ടിസ്റ്റ് നമ്പൂതിരി സമ്മാൻ ട്രസ്റ്റ്' ദേശീയ തലത്തിൽ മികച്ച രേഖാചിത്രകാരന് ഏർപ്പെടുത്തിയ പ്രഥമ പുരസ്‌കാരം ആർട്ടിസ്റ്റ് സി. ഭാഗ്യനാഥിന് നാളെ വൈകിട്ട് 5ന് ട്രസ്റ്റ് രക്ഷാധികാരികൂടിയായ നടൻ മോഹൻലാൽ സമ്മാനിക്കും. എറണാകുളം ടി.ഡി.എം ഹാളിൽ നടക്കുന്ന ചടങ്ങിൽ മാനേജിംഗ് ട്രസ്റ്റി ബാബു ജോസഫ് അദ്ധ്യക്ഷത വഹിക്കും. ജൂറി ചെയർമാൻ കെ.സി. നാരായണൻ, ജൂറി അംഗങ്ങളായ കേരള ലളിതകലാ അക്കാഡമി ചെയർപേഴ്‌സൺ മുരളി ചീരോത്ത്, കാർട്ടൂണിസ്റ്റും എഴുത്തുകാരനുമായ രവിശങ്കർ ഏട്ടേത്ത്, ട്രസ്റ്റ് അംഗങ്ങളായ ആർട്ടിസ്റ്റ് നമ്പൂതിരിയുടെ മകൻ ദേവൻ, കാർട്ടൂണിസ്റ്റ് സുധീർനാഥ്, ഡോക്യുമെന്ററി ഡയറക്ടർ ബിനുരാജ് കലാപീഠം എന്നിവരും ചടങ്ങിൽ സംബന്ധിക്കും.

സി. ഭാഗ്യനാഥ് 27 വർഷമായി മലയാളത്തിലെ വിവിധ പ്രസിദ്ധീകരണങ്ങളിൽ സാഹിത്യ രചനകൾക്കായി ചിത്രം വരയ്ക്കുന്നു. പ്രമുഖ എഴുത്തുകാരുടെ കഥകൾ, നോവലുകൾ, കവിതകൾ, ലേഖനങ്ങൾ എന്നിവയ്ക്കായും ചിത്രങ്ങൾ വരച്ചിട്ടുണ്ട്. കൊച്ചി മുസരിസ് ബിനാലെ, ലോകമേ തറവാട് തുടങ്ങി ഇന്ത്യയിലും വിദേശത്തും ഉൾപ്പെടെ നിരവധി പ്രദർശനങ്ങളിൽ ഭാഗ്യനാഥന്റെ രചനകൾ ഇടം പിടിച്ചിട്ടുണ്ട്. തലശേരി സ്വദേശിയായ ഭാഗ്യനാഥ് കൊച്ചിയിലാണ് താമസം. ചിത്രകലാ അദ്ധ്യാപികയായ ജയന്തിയാണ് ഭാര്യ. മകൾ: കല്യാണി.