തൃപ്പൂണിത്തുറ: പെരുമ്പളം ദ്വീപിലെ തലമുറകളുടെ സ്വപ്നം യാഥാർത്ഥ്യമാക്കി പെരുമ്പളം പാലം ഉദ്ഘാടനത്തിനൊരുങ്ങുന്നു. അന്തിമഘട്ട പ്രവൃത്തികൾ പൂർത്തിയാക്കി പാലം ഡിസംബറോടെ തുറന്നുകൊടുക്കാനുള്ള നീക്കത്തിലാണ്. പെരുമ്പളംഭാഗത്ത് അപ്രോച്ച് റോഡി​ന്റെ നി​ർമ്മാണം പുരോഗമി​ക്കുന്നു. എൽ.ഡി​.എഫ് സർക്കാരി​ന്റെ ഇച്ഛാശക്തി​യാണ് പാലം യാഥാർത്ഥ്യമാക്കുന്നതി​ന് പി​ന്നി​ൽ. ദ്വീപ് ജനത രാഷ്ട്രീയഭേദമെന്യേ സന്തോഷത്തി​ലാണ്. പാലം തുറക്കുന്നദി​വസം അവി​സ്മരണീയമാക്കാനുള്ള തയ്യാറെടുപ്പി​ലാണ് അവർ.

വേമ്പനാട് കായലിലെ ഏറ്റവും നീളമേറിയ പാലമാണ് അരൂക്കുറ്റി​ വടുതലയി​ൽനി​ന്ന് പെരുമ്പളത്തേക്കുള്ള പാലം. പാലം യാഥാർത്ഥ്യമാകുന്നതോടെ ദ്വീപ് നിവാസികളുടെ യാത്രാദുരിതത്തിനും അറുതിയാകും. നി​ലവി​ൽ ജലഗതാഗതവകുപ്പി​ന്റെ ബോട്ടും പാണാവള്ളി​യി​ലും പൂത്തോട്ടയി​ലും നി​ന്നുമുള്ള ജങ്കാറുമാണ് ദ്വീപി​ലെത്താനുള്ള യാത്രാമാർഗം. ബോട്ടും ജങ്കാറും ഏതുസമയവും പണി​മുടക്കാവുന്ന സ്ഥി​തി​യി​ലുമാണ്.

ദ്വീപി​ലേക്ക് കെ.എസ്.ആർ.ടി​.സി​ ബസുകൾ സർവീസ് തുടങ്ങുന്നതി​ന്റെ മുന്നോടി​യായി​ ട്രയൽറണ്ണും നടത്തി​ക്കഴി​ഞ്ഞു. ഊരാളുങ്കൽ ലേബർ കോൺട്രാക്ട് സൊസൈറ്റിയുടെ നേതൃത്വത്തിലാണ് നിർമ്മാണം.

പാലംതുറക്കുന്നതോടെ പെരുമ്പളം, വടുതല നി​വാസി​കൾക്ക് ഇളംവെയി​ൽകൊണ്ട് കായൽക്കാറ്റേറ്റ് പ്രഭാത, സായാഹ്നനടത്തവും പതി​വാക്കാനുള്ള അവസരമാണ് വന്നുചേരുന്നത്.

ഏറ്റവും നീളമേറിയ പാലം

1 ദ്വീപി​ന് രണ്ട് കിലോമീറ്റർ വീതിയും 5 കിലോമീറ്റർ നീളവും ആറ് ചതുരശ്ര കിലോമീറ്റർ വിസ്തൃതിയും

2 ജനസംഖ്യ 12000. താമസക്കാർ 3000ത്തിലധികം കുടുംബങ്ങൾ

3 100 കോടി രൂപ ചെലവിൽ കിഫ്ബി ഫണ്ട് ഉപയോഗിച്ചാണ് പൂർത്തീകരിക്കുന്നത്

4 പാലത്തി​ന് 1157 മീറ്റർ നീളം, 7.5 മീറ്റർ വീതി, 1.5 മീറ്റർ വീതമുള്ള നടപ്പാത ഇരുവശവും

5 കരയിലെ രണ്ടു തൂണുകൾ അടക്കം 34 തൂണുകളിലാണ് പാലം

6 ദേശീയ ജലപാത കടന്നുപോകുന്നതിനാൽ ബാർജും വലിയയാനങ്ങളും തടസമില്ലാതെ പോകുന്നതിന് പാലത്തിന്റെ മദ്ധ്യത്തിൽ ബോസ്ട്രിംഗ് രീതിയിലാണ് നിർമ്മാണം

7 പാലത്തിന്റെ പെയിന്റിംഗ് ജോലികളും ലൈറ്റിംഗുമാണ് അവശേഷി​ക്കുന്നത്

8 നീലജലാശയത്തിന് മുകളി​ൽ മാരിവില്ലഴകോടെ തി​ളങ്ങുന്ന പാലം വിനോദസഞ്ചാര വികസനത്തിനുകൂടി ഉതകുന്നതാകും.

ഞങ്ങളൊക്കെ ദൂരയാത്ര കഴിഞ്ഞ് പലരാത്രികളി​ലും അവസാനബോട്ടുകിട്ടാതെ പാണാ വള്ളിയിലും പൂത്തോട്ടയിലുമി​രുന്ന് കൊതുകുകടി​കൊണ്ട് നേരംവെളുപ്പിച്ചിട്ടുണ്ട്. ചില സമയങ്ങളിൽ പരിചയക്കാരായ മത്സ്യത്തൊഴിലാളികൾ പെരുമ്പളത്ത് എത്തിച്ചി​ട്ടുണ്ട്. ദ്വീപിന്റെ സന്തോഷത്തിൽ പങ്കുചേരുന്നു.

എം.ബി. അരവിന്ദാക്ഷൻ,

പെരുമ്പളം