മട്ടാഞ്ചേരി: പശ്ചിമകൊച്ചിയിലെ നൂറുകണക്കിന് സാധാരണക്കാർ ആശ്രയിക്കുന്ന കരുവേലിപ്പടി താലൂക്ക് ആശുപത്രിയുടെ ശോച്യാവസ്ഥ പരിഹരിക്കാൻ നടപടി സ്വീകരിക്കുമെന്ന് രണ്ടുവർഷംമുമ്പ് ആരോഗ്യമന്ത്രി വീണാ ജോർജ് നൽകി​യ ഉറപ്പും ജലരേഖയായി​. ആശുപത്രിയുടെ ശോചനീയാവസ്ഥ പരിഹരിക്കാൻ നടപടി വേണമെന്നാവശ്യപ്പെട്ട് മനുഷ്യാവകാശ കമ്മിഷനെ സമീപിച്ച് നാട്ടുകാർ. തൈക്കാവ് കൂട്ടായ്മയുടെ നേതൃത്വത്തിലാണ് മനുഷ്യാവകാശ കമ്മിഷനെ സമീപിച്ചത്.

പഴയകാലപ്രതാപം പേറുന്ന കരുവേലിപ്പടി മഹാരാജാസ് ആശുപത്രിയുടെ ശോചനീയാവസ്ഥ സംബന്ധിച്ച് മന്ത്രി സന്ദർശിച്ച വേളയിൽ അവിടെ കൂടിയനാട്ടുകാരും രോഗികളും ബോദ്ധ്യപ്പെടുത്തി​യി​രുന്നു. ആശുപത്രി പരിസരത്തെ വൃത്തിഹീനമായ അവസ്ഥ, കാടുപിടിച്ചു കിടക്കുന്ന ആശുപത്രി പരിസരത്ത് സാമൂഹ്യദ്രോഹികളുടെ വിളയാട്ടം, ലാബ് സൗകര്യത്തിന്റെ അപര്യാപ്തത, മതിയായ കാരണമില്ലാതെ രോഗികളെ മറ്റ് ആശുപത്രിയിലേക്ക് റഫർചെയ്യുന്നത്, ആംബുലൻസ് സംവിധാനത്തിന്റെ പോരായ്മ, പോസ്റ്റുമോർട്ടം നടത്താത്തത്, കാന്റീൻ സൗകര്യമി​ല്ലാത്തത്, കിഫ്ബി പദ്ധതിയിലൂടെ തുടക്കമിട്ട ആശുപത്രി നവീകരണ പരിപാടി എങ്ങും എത്താത്തത് തുടങ്ങി ഒട്ടേറെ പരാതികളാണ് മന്ത്രിക്കുമുന്നി​ൽ വി​വരി​ച്ചത്. ഇവയിൽ ഭൂരിഭാഗം കാര്യങ്ങൾക്കും ഇപ്പോഴും പരി​ഹാരമായി​ട്ടി​ല്ല.

പരാതി​യി​ൽ പറയുന്നത്

* ഡോക്ടർമാരുടേയും ജീവനക്കാരുടേയും കുറവ് രോഗികളെ ബുദ്ധി​മുട്ടി​ക്കുന്നു

* സർജൻ ഇല്ലാതായിട്ട് നാളുകളായി. സ്ഥിരമായി ശിശുരോഗ വിദഗ്ദ്ധനുമില്ല

* എക്സ്റേ മെഷീൻ തകരാറിലാകുന്നത് പതിവായി​

* ഇ.സി.ജി സംവിധാനത്തി​ന്റെ പോരായ്മയുമുണ്ട്

* 250ഓളം കിടക്കകളുണ്ടെങ്കിലും കിടത്തിചികിത്സ പത്തിൽ താഴെ പേർക്ക് മാത്രം

* ഒ.പി സമയം കഴിഞ്ഞാൽ ഒരു ഡോക്ടർ മാത്രമേ ആശുപത്രിയിൽ ഉണ്ടാകുകയുള്ളു.

ആശുപത്രി വളപ്പിൽ പലയിടങ്ങളിലും കാടുപിടിച്ച് കിടക്കുന്നു

ഇഴജന്തുക്കളുടേയും തെരുവുനായ്ക്കളുടേയും ശല്യം രൂക്ഷം