പറവൂർ: ഇരുട്ടുകുത്തി വള്ളങ്ങൾ പങ്കെടുക്കുന്ന ഗോതുരുത്ത് മുസിരിസ് ജലോത്സവം ഇന്ന് ഗോതുരുത്ത് - തെക്കേത്തുരുത്ത് പുഴയിൽ നടക്കും. മദ്ധ്യകേരള ബോട്ട് റേയ്‌സ് വെൽഫെയർ അസോസിയേഷന്റെ സഹകരണത്തോടെ ഗോതുരുത്ത് മുസിരിസ് ബോട്ട് റേയ്‌സ് ക്ലബാണ് സംഘടിപ്പിക്കുന്നത്. എ ഗ്രേഡിൽ ഗോതുരുത്തുപുത്രൻ, പൊഞ്ഞനത്തമ്മ, ഹനുമാൻ ഒന്നാമൻ, പുത്തൻപറമ്പിൽ, സെന്റ് സെബാസ്റ്റ്യൻ ഒന്നാമൻ, തുരുത്തിപ്പുറം, ഗരുഡൻ, താണിയൻ എന്നീ വള്ളങ്ങളും ബി ഗ്രേഡിൽ, മടപ്ലാതുരുത്ത്, ചെറിയപണ്ഡിതൻ, മയിൽപ്പീലി, പമ്പാവാസൻ, ജിബി തട്ടകൻ, സെന്റ് സെബാസ്റ്റ്യൻ രണ്ടാമൻ, ഗോതുരുത്ത്, വടക്കുംപുറം എന്നിവയും പങ്കെടുക്കും.

രാവിലെ 10ന് സെന്റ് സെബാസ്റ്റ്യൻസ് പള്ളി വികാരി ഫാ. ഡോ. ജാക്സ‌ൻ വലിയപറമ്പിൽ പതാക ഉയർത്തും. പ്രതിപക്ഷനേതാവ് വി.ഡി. സതീശൻ ജലമേള ഉദ്ഘാടനം ചെയ്യും. ക്ലബ് പ്രസിഡന്റ് റോഷൻ മനക്കിൽ അദ്ധ്യക്ഷനാകും. നടൻ വിജയകുമാർ മുഖ്യാതിഥിയാകും. ജില്ലാ പഞ്ചായത്ത് അംഗം എ.എസ്. അനിൽകുമാർ ഫ്ലാഗ്ഓഫ് ചെയ്യും. ബ്ലോക്ക് പഞ്ചായത്ത് അംഗം നിത സ്‌റ്റാലിൻ തുഴ കൈമാറും. വിജയികൾക്ക് തൃശൂർ ജില്ലാപഞ്ചായത്ത് പ്രസിഡന്റ് വി.എസ്. പ്രിൻസ് ട്രോഫികൾ സമ്മാനിക്കും.