ഇടുക്കി: തിരഞ്ഞെടുപ്പിന് മുന്നോടിയായി തദ്ദേശസ്വയംഭരണ സ്ഥാപനങ്ങളിലെ വാർഡുകളുടെയും ഡിവിഷനുകളുടെയും സംവരണത്തിനുള്ള നറുക്കെടുപ്പ് തീയതിയും സമയവും സ്ഥലവും നിശ്ചയിച്ച് സംസ്ഥാന തിരഞ്ഞെടുപ്പ് കമ്മിഷൻ വിജ്ഞാപനം പുറപ്പെടുവിച്ചു. സ്ത്രീ, പട്ടികജാതി സ്ത്രീ, പട്ടികവർഗ സ്ത്രീ, പട്ടികജാതി, പട്ടികവർഗം എന്നീ വിഭാഗങ്ങൾക്ക് സംവരണം ചെയ്തിട്ടുള്ളത്രയും എണ്ണം സ്ഥാനങ്ങൾ ആവർത്തന ക്രമമനുസരിച്ച് ഏത് വാർഡുകൾക്കാണ് നൽകേണ്ടതെന്ന് തീരുമാനിക്കുന്നതിനാണ് നറുക്കെടുപ്പ് നടത്തുന്നത്. ഗ്രാമ, ബ്ളോക്ക്, ജില്ലാ പഞ്ചായത്തുകളുടെ സംവരണം നിശ്ചയിക്കുന്നതിന് അതത് ജില്ലകളിലെ ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടറെയും നഗരസഭാ വാ‌ർഡുകളിലേതിന് അതത് തദ്ദേശസ്വയംഭരണ വകുപ്പ് ജില്ലാ ജോയിന്റ് ഡയറക്ടർമാരെയുമാണ് അധികാരപ്പെടുത്തി വിജ്ഞാപനം പുറപ്പെടുവിച്ചത്. ഗ്രാമപഞ്ചായത്തുകളിലേയ്ക്ക് 13 മുതൽ 15 വരെ കളക്ടറേറ്റ് കോൺഫറൻസ് ഹാളിലാണ് നറുക്കെടുപ്പ് നടത്തുക. ബ്ളോക്ക് പഞ്ചായത്ത് ഡിവിഷനുകളിലെ നറുക്കെടുപ്പ് 18നും ജില്ലാപഞ്ചായത്ത് ഡിവിഷനുകളിലെ നറുക്കെടുപ്പ് 21നും രാവിലെ 10ന് കളക്ടറേറ്റ് കോൺഫറൻസ് ഹാളിൽ നടക്കും. ജില്ലയിലെ രണ്ട് നഗരസഭകളായ തൊടുപുഴ, കട്ടപ്പന നഗരസഭാ വാ‌ർഡുകളിലേയ്ക്കുള്ള സംവരണത്തിനുള്ള നറുക്കെടുപ്പ് 16ന് ജില്ലാ പഞ്ചായത്ത് ഹാളിൽ രാവിലെ 10ന് നടക്കും.

ഗ്രാമപഞ്ചായത്തുകളുടെ നറുക്കെടുപ്പ് (കളക്ടറേറ്റ് കോൺഫറൻസ് ഹാളിൽ)

 13ന് രാവിലെ 10ന്- അടിമാലി, ഇടുക്കി, തൊടുപുഴ ബ്ലോക്ക് പഞ്ചായത്തുകളുടെ കീഴിലുള്ള പഞ്ചായത്തുകൾ

 14ന് രാവിലെ 10ന്- ദേവികുളം, നെടുങ്കണ്ടം ബ്ലോക്ക് പഞ്ചായത്തുകളുടെ കീഴിലുള്ള പഞ്ചായത്തുകൾ

 15ന് രാവിലെ 10ന്- അഴുത, ഇളംദേശം, കട്ടപ്പന ബ്ലോക്ക് പഞ്ചായത്തുകളുടെ കീഴിലുള്ള പഞ്ചായത്തുകൾ