മണിയാറൻകുടി ഉടുമ്പന്നൂർ റോഡിന്റെ നിർമ്മാണ ഉദ്ഘാടനം നടത്തി
റോഡ് ബി.എം ആന്റ് ബി.സി നിലവാരത്തിൽ നിർമ്മിക്കുന്നതിനായി 5 കോടി അനുവദിച്ചു

ഇടുക്കി:സംസ്ഥാന സർക്കാർ എന്നും മലയോര ജനതയോടൊപ്പമാണെന്ന് വനം മന്ത്രി എ.കെ. ശശീന്ദ്രൻ. മണിയാറൻകുടിയിൽ സംഘടിപ്പിച്ച മണിയാറൻകുടി ഉടുമ്പന്നൂർ റോഡിന്റെ നിർമ്മാണ ഉദ്ഘാടനം ഓൺലൈനായി നിർവഹിക്കുകയായിരുന്നു മന്ത്രി. ദുരിതങ്ങളും പ്രയാസങ്ങളും അനുഭവിക്കുന്ന ഘട്ടങ്ങളിലെല്ലാം കർഷക സമൂഹത്തോടൊപ്പമാണ് സർക്കാർ നിന്നിട്ടുള്ളത് വന്യജീവികളുടെ ആക്രമണം മൂലം പ്രയാസമനുഭവിക്കുന്നവരുടേതാണ്. കേന്ദ്രത്തിന്റെ കർക്കശമായ നിലപാടാണ് നിലവിലുള്ളത്. ഈ നിയമങ്ങളിൽ മാറ്റം വരുത്തണമെന്ന് പലപ്പോഴായി കേരള നിയമസഭയും സർക്കാർ പ്രതിനിധികളും കേന്ദ്രസർക്കാരിനോട് ആവശ്യപ്പെട്ടിരുന്നു. ഇന്നുവരെ ആ ശ്രമത്തിന് ഫലമൊന്നും ലഭിക്കാത്ത സാഹചര്യത്തിലാണ്, കേന്ദ്രനിയമത്തിന്റെ പരിമിതിയിൽ നിന്നുകൊണ്ട് തന്നെ ചില ഇളവുകൾ വേണം എന്ന താൽപ്പര്യത്തോടു കൂടി പുതിയൊരു നിയമനിർമ്മാണം നടത്തിയിട്ടുള്ളത്.

മന്ത്രി റോഷി അഗസ്റ്റിൻ പൊതുസമ്മേളന ഉദ്ഘാടനവും ശിലാഫലകം അനാച്ഛാദനവും നിർവ്വഹിച്ചു.ഉദ്ഘാടനസമ്മേളനത്തിന് ശേഷം മന്ത്രി ഉൾപ്പെടെയുള്ള ജനപ്രതിനിധികൾ റോഡ് സന്ദർശിച്ചു.

അഡ്വ.ഡീൻ കുര്യാക്കോസ് എം.പി. യോഗത്തിൽ അദ്ധ്യക്ഷത വഹിച്ചു. പി.എം.ജി.എസ്.വൈ എക്സിക്യൂട്ടീവ് എഞ്ചിനീയർ സുധീന കെ. എം റിപ്പോർട്ട് അവതരിപ്പിച്ചു.

മണിയാറൻകുടിയിൽ നിന്നും 18.5 കിലോമീറ്റർ ദൈർഘ്യമുള്ള റോഡ് രണ്ട് റീച്ചുകളിലായി പി.എം.ജി.എസ്.വൈ. പദ്ധതിയിൽ ഉൾപ്പെടുത്തി 14.82 കോടി രൂപ അനുവദിച്ചാണ് നിർമ്മാണം ആരംഭിക്കുന്നത്. നിലവിൽ 6 മീറ്റർ വീതിയിലാണ് റോഡുള്ളത്. പദ്ധതി പ്രകാരം 8 മീറ്റർ വീതി ആവശ്യമായതിനാൽ പകരം ഭൂമി റവന്യൂ വകുപ്പ് മുഖേന മറയൂർ വില്ലേജ് ബ്ലോക്ക് നമ്പർ 52ലെ 30 ഏക്കർ സ്ഥലം സർവ്വേ ചെയ്ത്, വനം വകുപ്പിന് കൈമാറുന്നതിന് പരിവേഷ് സൈറ്റിൽ അപ്‌ലോഡ് ചെയ്തിട്ടുണ്ട്.

യോഗത്തിൽ ജില്ലാ പഞ്ചായത്ത് പ്രസിഡന്റ് രാരിച്ചൻ നീറണാംകുന്നേൽ, ജില്ലാ കളക്ടർ ഡോ. ദിനേശൻ ചെറുവാട്ട്, ബ്ലോക്ക് പഞ്ചായത്ത് പ്രസിഡന്റ് ഡോളി സുനിൽ, ഗ്രാമപഞ്ചായത്ത് പ്രസിഡന്റുമാരായ ജോർജ് പോൾ,
ജോർജ് ജോസഫ്, എം ലതീഷ്., വാഴത്തോപ്പ് ഗ്രാമപഞ്ചായത്ത് വൈസ് പ്രസിഡന്റ് മിനി ജേക്കബ്, ജില്ലാ പഞ്ചായത്ത് അംഗം കെ. ജി സത്യൻ, കോതമംഗലം ഡി.എ.ഫ്.ഒ. സൂരജ് ബെൻ, ത്രിതല പഞ്ചായത്ത് അംഗങ്ങളായ ഡിറ്റാജ് ജോസഫ്, ആൻസി തോമസ്, പ്രഭ തങ്കച്ചൻ, സിജി ചാക്കോ, രാജു ജോസഫ്, വിൻസെന്റ് വള്ളാടി, ആലീസ് ജോസ്, സെലിൻ വിത്സൻ, കുട്ടായി കറുപ്പൻ, ടിന്റു സുഭാഷ്, അജേഷ് ചന്ദ്രൻ, തുടങ്ങിയ ജനപ്രതിനിധികൾ, രാഷ്ട്രീയ സാംസ്‌കാരിക സാമൂഹിക നേതാക്കൾ തുടങ്ങിയവർ പങ്കെടുത്തു.

ചിത്രം 1. മന്ത്രി എ.കെ. ശശീന്ദ്രൻ മണിയാറൻകുടി ഉടുമ്പന്നൂർ റോഡിന്റെ നിർമ്മാണം ഉദ്ഘാടനം ഓൺലൈനായി നിർവഹിക്കുന്നു.
2. മന്ത്രി റോഷി അഗസ്റ്റിൻ പൊതുസമ്മേളന ഉദ്ഘാടനവും ശിലാഫലകം അനാച്ഛാദനവും നിർവ്വഹിച്ചു സംസാരിക്കുന്നു.
3. മന്ത്രി റോഷി അഗസ്റ്റിൻ മണിയാറൻകുടി ഉടുമ്പന്നൂർ റോഡിന്റെ ശിലാഫലകം അനാച്ഛാദനം നിർവ്വഹിക്കുന്നു.