ഇടുക്കി: കൊന്നത്തടി പഞ്ചായത്ത് നടപ്പാക്കുന്ന വിവിധ പദ്ധതികളുടെ പൂർത്തികരണ പ്രഖ്യാപനം മന്ത്രി റോഷി അഗസ്റ്റിൻ നിർവഹിച്ചു. മുനിയറ - കരിമല - വട്ടക്കണ്ണിപ്പാറ റോഡിന് അടുത്ത ബജറ്റിൽ 5 കോടി രൂപ അനുവദിക്കുമെന്നും ബി.എം.ബി.സി നിലവാരത്തിൽ റോഡിന്റെ നിർമ്മാണം പൂർത്തിയാക്കാനുള്ള അനുമതി നൽകുമെന്നും മന്ത്രി പ്രഖ്യാപിച്ചു. കരിമല ടൂറിസം പദ്ധതി, 22 സ്മാർട്ട് അങ്കണവാടികൾ, ഹൈടെക്ക് ക്ലാസ് മുറികളാക്കിയ കൊന്നത്തടി ഗവ.എൽ.പി സ്‌കൂൾ, കൊന്നത്തടി യു.പി സ്‌കൂൾ, മുതിരപ്പുഴ ഗവ.എൽ.പി സ്‌കൂൾ, സംസ്ഥാന സർക്കാരിന്റെ നിലാവ് പദ്ധതിയിൽ ഉൾപ്പെടുത്തി 18 ലക്ഷം രൂപ ചെലവിൽ പഞ്ചായത്തിലെ 19 വാർഡുകളിലും തെരുവ് വിളക്കുകൾ സ്ഥാപിച്ചത്, 18 ലക്ഷം രൂപ ചെലവിൽ 31 സോളാർ ലൈറ്റുകളും സ്ഥാപിച്ചത് തുടങ്ങി പഞ്ചായത്തിൽ പൂർത്തിയാക്കിയ വിവിധ പദ്ധതികളുടെ പ്രഖ്യാപനമാണ് മന്ത്രി നിർവഹിച്ചത്. മുനിയറ ടൗണിൽ സംഘടിപ്പിച്ച യോഗത്തിൽ പഞ്ചായത്ത് പ്രസിഡന്റ് രമ്യ റനീഷ് അദ്ധ്യക്ഷത വഹിച്ചു. ഗ്രാമപഞ്ചായത്ത് സ്ഥിരം സമിതി അധ്യക്ഷൻ ടി.പി മൽക്ക, ത്രിതല പഞ്ചായത്ത് അംഗങ്ങളായ സുമംഗല വിജയൻ, മേരി ജോർജ്, അച്ചാമ്മ ജോയി, അനീഷ് ബാലൻ, റ്റി.കെ കൃഷ്ണൻകുട്ടി, വിവിധരാഷ്ട്രീയ കക്ഷി നേതാക്കളായ ഷാജി കാഞ്ഞമല, ഷാജി കൊച്ചുപുര, വി.എം ബേബി, ഷിജു മാനാംതടം എന്നിവർ പങ്കെടുത്തു.

.