കട്ടപ്പന: ഗവ. ഐ.ടി.ഐ കോളേജിലെ കാന്റീൻ തുറന്നു പ്രവർത്തിക്കാത്തതിൽ എസ്.എഫ്.ഐ കഞ്ഞി വെച്ച് പ്രതിഷേധിച്ചു. കാന്റീൻ അടച്ച് പൂട്ടി മാസങ്ങൾ കഴിഞ്ഞിട്ടും തുറന്നു പ്രവർത്തിക്കാൻ അധികൃതർ തയ്യാറായിട്ടില്ല. സാധാരണക്കാരുടെയും തോട്ടം തൊഴിലാളികളുടെയും മക്കൾ പഠിക്കുന്ന ഇവിടെ കുറഞ്ഞ നിരക്കിലായിരുന്നു ഭക്ഷണം ലഭിച്ചിരുന്നത്. ഇത് വിദ്യാർത്ഥികൾക്ക് വളരെ പ്രയോജനമായിരുന്നു. കാന്റീൻ തുറന്നു പ്രവർത്തിപ്പിക്കാത്തതുമൂലം വലിയ തുക മുടക്കി പുറത്തുപോയി ഭക്ഷണം കഴിക്കേണ്ട സാഹചര്യമാണ്. ബന്ധപ്പെട്ട അധികൃതരുടെ ഭാഗത്തുനിന്നുണ്ടാകുന്ന കെടുകാര്യസ്ഥതയാണ് ഇതിനുപിന്നിലെന്നും സമരം അടിച്ചമർത്താനാണ് ശ്രമിക്കുന്നതെന്നും എസ്.എഫ്‌.ഐ ആരോപിച്ചു. കാന്റീൻ തുറന്നു പ്രവർത്തിക്കുന്നതുവരെ പ്രതിഷേധം തുടരാനാണ് എസ്.എഫ്‌.ഐ തീരുമാനം.