കട്ടപ്പന: ആശ സമര സഹായസമിതി കട്ടപ്പനയിൽ പ്രതിഷേധ സദസ് സംഘടിപ്പിച്ചു. 22ന് തിരുവനന്തപുരത്ത് നടക്കുന്ന സെക്രട്ടറിയേറ്റ് മാർച്ചിനു മുന്നോടിയായാണ് പരിപാടി. കെപിസിസി സെക്രട്ടറി തോമസ് രാജൻ ഉദ്ഘാടനംചെയ്തു. യുഡിഎഫ് അധികാരത്തിൽ വന്നാൽ ആശപ്രവർത്തകരുടെ അവകാശങ്ങൾ സംരക്ഷിക്കുമെന്ന് അദ്ദേഹം പറഞ്ഞു. തദ്ദേശ സ്വയംഭരണ തെരഞ്ഞെടുപ്പിൽ ആശമാരുടെ അവകാശങ്ങൾ ഹനിക്കുന്ന സർക്കാരിനെതിരെ വീട് വീടാന്തരം പ്രചരണം നടത്തണമെന്നും ആശമാർ വിചാരിച്ചാൽ എല്ലാ പഞ്ചായത്തുകളിലും ഇടതുപക്ഷത്തിന്റെ പരാജയം ഉറപ്പാണെന്നും തോമസ് രാജൻ പറഞ്ഞു. ആശാവർക്കർ സരിത കെ സാബു അദ്ധ്യക്ഷയായി. ആശാവർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറി ആർ ബിന്ദു മുഖ്യപ്രഭാഷണം നടത്തി. നഗരസഭ കൗൺസിലർ പ്രശാന്ത് രാജു, ടി ജെ പീറ്റർ, അനിൽ, രാജശേഖരൻ, തങ്കമണി കമലഹാസൻ എന്നിവർ സംസാരിച്ചു.
ആശ സമര സഹായസമിതി കട്ടപ്പനയിൽ നടത്തിയ പ്രതിഷേധ സദസ് കെ.പി.സി,സി സെക്രട്ടറി തോമസ് രാജൻ ഉദ്ഘാടനം ചെയ്യുന്നു.