കട്ടപ്പന: ഇരട്ടയാർ നോർത്ത് വെട്ടിക്കാമറ്റം പുത്തൻപാലം - ഈറ്റോലിക്കവല റോഡരികിൽ തൊഴിലുറപ്പ് തൊഴിലാളികൾ നിർമിച്ച ജൈവവേലികൾ സാമൂഹിക വിരുദ്ധർ നശിപ്പിച്ചു. ഞായറാഴ്ച രാത്രിയാണ് സംഭവം. പിഴുതുമാറ്റിയ വേലികൾ സമീപത്തെ തോട്ടിൽ തള്ളിയനിലയിലാണ്. നിർമാണം പൂർത്തിയായെങ്കിലും ഉദ്യോഗസ്ഥർ സ്ഥലം സന്ദർശിക്കുന്നതിന് മുമ്പേയാണ് വേലികൾ തകർത്തത്. നെടുങ്കണ്ടം പഞ്ചായത്തിലെ 19-ാം വാർഡിൽ ഉൾപ്പെട്ട പ്രദേശമാണിവിടം.

തൊഴിലുറപ്പിൽ ഉൾപ്പെടുത്തി മൂന്നുദിവസം കൊണ്ടാണ് പത്ത് തൊഴിലാളികൾ നിർമാണം പൂർത്തീകരിച്ചത്. വേലികൾ നശിപ്പിക്കപ്പെട്ടതിനാൽ വേതനം ലഭിക്കാത്ത സ്ഥിതിയുണ്ടാകും. വേലി നിർമിക്കാനാവശ്യമായ സാമഗ്രികൾ ദൂരെ സ്ഥലങ്ങളിൽ നിന്നാണ് എത്തിച്ചത്. തൊഴിലാളികൾ നെടുങ്കണ്ടം പൊലീസിലും തൊഴിലുറപ്പ് ഓഫീസിലും പരാതി നൽകി.